فاريزا وڭعارسىنوۆانىڭ ەڭ ۇزدىك 10 ولەڭى
قانشاما حالىقتى قارا ولەڭمەن جۇباتىپ، جۇرتتىڭ سۇيىسپەنشىلىگىنە بولەنگەن قايتالانباس تۇلعا فاريزانىڭ ەڭ ۇزدىك ولەڭدەرىن ۇسىنامىز.
بۇگىندە بۇل ولەڭدەرگە قازاق ەستراداسىنىڭ جۇلدىزدارى ءان جازدىرتىپ، قازىرگى تاڭدا ولار حالىقتىڭ سۇيىكتى اۋەندەرىنە اينالعان.
فاريزا وڭعارسىنوۆانىڭ ەڭ ۇزدىك 10 ولەڭى
ايشا ءبيبى
قانشا رەت قانشا تۇردى جىرلى دالا؟
جادىنا جازعان جالعىز كۇن - عۇلاما!
بابامنىڭ كۋاسىندەي ايشا - ءبيبى،
قادالعان قۇباجولعا ءبىر مۇنارا.
قانداي جان سەزىمى ءۇشىن تارتتى ازاپ؟
ال ءوزىم ەلەستەتەم شاقتى عاجاپ،
سەزىمدى شەرتىپ، ءمانىن پاش ەتكەندەي، اتى قازاق.
ءومىردىڭ جولدارى ما، توندارى ما؟
تۇرعانداي تۇسەڭگىرىپ توڭ جانىما،
تاۋبە دە، جەر بەتىندە شىن سەزىمنىڭ بولعانىنا!
سول جىگىت قۇلاي سۇيگەن ايشاگۇلدى،
كۇن سايىن كورۋ ءۇشىن جاسىل وردەن.
قوڭىر كۇزدەر جۇرەگى كۇڭىرەنىپ،
جاسىمەن مۇنارانىڭ تاسىن كەشكەن!
جوعالعان ماحاببات
ارمانىم سەن ەدىڭ
ارداعىم سەن ەدىڭ
ءوزىڭسىز ءومىرىم كوڭىلسىز دەپ ەدىم،
كورمەسەم جابىعىپ سارعايىپ ساعىنىپ.
وزىڭمەن ءبىر ەدى بال ارمان اق ءۇمىت،
كۇندەر-اي ساعىنعان جالىنداعان،
ەركىنە باعىنعان باعىنباعان.
جوق بۇگىن ماحاببات ارمانىمدا،
شىنىمەن جوعالتىپ العانىم با.
نە دەيىن كوڭىلگە ءتۇسىم بە ءوڭىم بە،
كىنالى كىم بۇعان ءوزىم بە ءومىر مە،
جاينايىن تاعى دا نۇر قۇيىپ تاڭىما،
جوعالعان ماحاببات ورالشى جانىما.
جاقسى كورۋ
ءومىرىڭ تاڭداي بولسا ارايلاعان،
قاتىگەز قاراۋلىققا جولاي ما ادام؟
بىرەۋدى جاقسى كورگەن قانداي جاقسى -
نۇرلانىپ كەتەدى ەكەن بار اينالاڭ!
جاقسى كورۋ، جاقسى كورۋ،
نە دەگەن كەرەمەت ەڭ!
ءومىردى سەزىنۋگە،
قۋانىپ كوز ىلۋگە
ادامعا جاقسى كورۋ كەرەك ەكەن.
ديدارىڭ اۋمايدى ەكەن جارىق كۇننەن،
عاشىق بوپ قالعانىمدى جاڭا ۇقتىم مەن.
كەلبەتىڭ كوز الدىمدا، ويىمدا سەن،
ءوزىڭدى جاقسى كورىپ قالىپپىن مەن.
ەشكىمگە سودان بەرى الاڭداماي،
جۇرەگىم جانارىڭا قامالعانى-اي!
عاجايىپ كۇي كەشتىرگەن سەزىم - ساۋلە
ءوزىمدى جەتەلەيدى ساعان قاراي.
قىز ماحابباتى
بىلمەيمىن:
جانارىڭنان سىر ۇقتىم با،
الدە ءوزىمدى سول ساتتە ۇمىتتىم با -
ءوزىڭ بولدىڭ، ايتەۋىر، بۇل كۇنگى ءانىم،
كوتەرىپ اپ كەتىپ ەڭ - بۇلقىنبادىم -
الدە ايمالاۋىڭا قۇنىقتىم با؟!
بىلمەيمىن:
قۇشاعىڭدا ءدىر ەتتىم بە،
الىپ ۇشىپ بارا ما-اۋ جۇرەك مۇلدە...
ويلاعىم دا كەلمەدى ەشتەڭەنى،
كۇندىز بە الدە، بىلمەيمىن كەشتە مە ەدى،
تەك ۇققانىم - جان بىرگە، تىلەك بىرگە.
بىلمەيمىن:
پاك سەزىمگە مۇقتاجداۋ كەزىم بە ەدى،
سەنىمىڭدى كوپ بولعان سەزىنگەلى،
سەزىنگەلى، سەنى ويلاپ كوز ىلگەلى...
ىڭكارلىقتان، اياۋلىم، تىنا كورمە،
باقىت دەگەن ساتتەردەن تۇرا ما الدە،
وندا ءوتىپ كەتپەگەي تەز ىلگەرى.
سول ساتتە
بۇلتتى اسپاننان جارق ەتىپ قارادى اق كۇن،
شۋاعىنا بويىمدى ارالاتتىم.
سەزىمىمنىڭ قاقپاسىن دارا قاقتىڭ.
ەلجىرەسىپ، ۇعىسىپ، سەنىپ بىرگە،
اعىل-تەگىل سەزىممەن ەرىتتىڭ دە،
ءوزىڭ ماعان ءوزىم بوپ بارا جاتتىڭ...
اق مامام
ەركەلەسەم كۇلىمدەيتىن،
ۇرىسقانى بىلىنبەيتىن.
ماڭدايىمنان يىسكەپ مەنىڭ،
قۇلىنشاعىم كۇنىم دەيتىن.
اق مامام، اق مامام
قۇلىنشاعىم كۇنىم دەيتىن.
الەمدەگى اقىلدى ادام،
بارىنەن سول جاقىن ماعان.
ول جانىمدا جۇرسە مەن دە،
باتىرلارشا باتىلدانام.
جاماندىقتان ساقتاندىرىپ،
جاقسى ءىسىمدى ماقتان قىلىپ.
ماپەلەگەن اق مامامدى،
جۇرسەم دەيمىن شاتتاندىرىپ.
ايەلگە دەگەن ماحاببات
تۇندەردە جالىن بوپ وتكەن،
بىرەۋدى جانىم دەپ وپكەن.
سەنىڭ گۇل ەرىندەرىڭنەن،
ايتەۋىر جەرىنبەدىم مەن.
جۇتتىم دا كوزدە جاسىڭنان،
توسىڭنەن وزگەگە اشىلعان،
باسىمدى الا المادىم مەن.
(قايعىم با ەڭ، جانار باعىم با ەڭ؟!).
كولدەگى ساعىم كورىكپەن
جاناردى جانىمدى ەرىتكەن
قۇشتىم مەن اشقاراق كۇيمەن
(بىلەمىن - باسقا دا سۇيگەن).
ەڭ العاش قۇشقانىم دا - ءوزىڭ،
بالقىتقان كۇش-جالىن دا - ءوزىڭ،
ەڭ العاش ءسۇيۋ دەگەندى
ۇيرەتكەن ۇستازىم دا - ءوزىڭ.
جانىمنان مۇڭىم كەتكەلى
سەن بولدىڭ كۇنىم كوكتەگى.
...قايعىم تەك - وسىنىڭ ءبارى
باسىڭنان بۇرىن دا وتكەنى...
مەن ساعان عاشىق ەمەس ەم
سەن ءۇشىن سوناۋ الىستارداعى ەلەس ەم.
وسىنشا مەنى ارمان قىپ كەلدىڭ نەگە سەن.
«سىرتىڭنان ءسۇيىپ جۇرەتىنىمدى
سەزۋشى ەدىڭ عوي»، - دەمەسەڭ،
مەن ساعان عاشىق ەمەس ەم.
باس يگەن كوپ-كوپ بوزبالالارعا پاڭدانا
اسقاقتاۋ باسىپ، باقىتتى بولدىم. «سوندا دا
جان-جۇرەگىڭدى تولتىرار ءبىر جان
جەتپەي ءجۇردى عوي»، - دەمەسەڭ،
مەن ساعان عاشىق ەمەس ەم.
ءبىر داۋىل ءساتتىڭ سوعارىن سەزىپ جۇرگەنمەن،
سەن ەكەنىڭدى بىلگەن بە ەم...
ايتەۋىر، جانىم، «بۇل كۇندە مەنسىز
جۇرە المايسىڭ عوي»، - دەمەسەڭ،
مەن ساعان عاشىق ەمەس ەم.
دوستار
اق، قارامىز، سارىمىز
تاتۋ دوسپىز ءبارىمىز
دوستىق جايلى ءان سالىپ،
شىرقاتايىق كانە ءبىز
جۇزىمىزگە قاراڭىز
بال-بۇل جانعان بالامىز
بىزگە قىمبات كۇن شۋاق
بىزگە قىمبات انامىز
كۇننىڭ نۇرىن سۇيەمىز
قىردىڭ گۇلىن سۇيەمىز
ءبىزدى ويناتىپ تاتەلەر
كۇلدىرگەنىن سۇيەمىز
بالدىرعانبىز اراي ءجۇز
بال-بۇل جانىپ قارايمىز
ويىنشىقتار بىزدەردە
كوپ بولعانىن قالايمىز
تالاسپايمىز ءبىز ءبىراق
وتىرامايمىز تۇنجىراپ
قۋىسامىز كوگالدا
جۇگىرەمىز قۇلدىراپ
ءان سالامىز كۇندە ءبىز
شاتتىق تولى ىرگەمىز
ءبىز ماڭگىگە دوستارمىز
ءبىز ماڭگىگە بىرگەمىز
ءومىر سەن
بالالىق شاقتىڭ انىمەن،
بالاۋسا، بالعىن سانىمەن
ەرتەگىلەردىڭ ەلىنەن
ەركەلەي باسىپ كەلىپ ەم.
ءومىردىڭ كوركەم باعىنان
ءوزىڭدى كورسەم، جانىم-ءان!
بولەپ ەڭ مەنى باقىتقا،
سول كۇندەرىمدى ساعىنام.
ا-حاۋ، سول ءبىر كۇندەر-اي،
ساعىندىڭ با ءوزىڭ دە...
جالعىز سەنسىڭ - ومىردە،
جالعىز سەنسىڭ - كوڭىلدە.
جالعىز سەن عانا جالعاندا
باستايتىن مەنى تاڭدارعا!
جانىمدا بولسا ەكەن دەپ،
ورانام اپپاق ارمانعا.
قۋانىش شاششى كوڭىلگە
تۇسىمدە جانە وڭىمدە!
عاشىق بوپ، جانىم، ءجۇرمىن مەن
سەن بار دەپ مىناۋ ومىردە!
اناجان
ايالاپ كولدەي
نۇر شاشىپ كۇندەي
جانىنا مەنى بالاعان
كوڭىلى كوكتەم
مەيرىمىن توككەن
اياۋلىم سەنسىڭ، اناجان
اسىل ءانىمسىڭ، جازعى تاڭىمسىڭ
وزىڭمەن نۇرلى جولدارىم
تىلسىم جىلداردا
قيىن سىنداردا
تىلەگىڭ - مەنىڭ قورعانىم
قايدا جۇرسەم دە
ويىم ءبىر سەندە
سەنىمىڭ بولدى تۇمارىم
بولسام دەپ بىرگە
ساعىنام كۇندە
جان انا سەنسىڭ
جىر ءانىم.
Stan.kz
