كوڭىلدى ءجۇرۋدىڭ 10 قۇپياسى

استانا. قازاقپارات - كوڭىلدى ءجۇرۋ - الداعى ساتتىلىكتىڭ جارشىسى بولا الادى. ول ءۇشىن بولماسقا رەنجىپ، اۋا-رايىنا قوبالجۋدىڭ قاجەتى جوق.

باستىسى - ءوز كوڭىلىڭىزدى ءوزىڭىز كوتەرە ءبىلىڭىز. ولاي بولسا ءبىز سىزدەرگە كوڭىلدى ءجۇرۋدىڭ 10 قۇپياسى تۋرالى ايتا كەتپەكپىز.

1. ۇنەمى كوڭىلدى ءجۇرۋ ءۇشىن ءوزىڭىزدى باقىلاپ ۇيرەنىڭىز. بولمايتىن نارسەلەرگە رەنجىپ، جاقىندارىڭىزدى رەنجىتپەڭىز. كوڭىلىڭىزدى قالدىرعان ادامداردى كەشىرە ءبىلىڭىز. سول ارقىلى وزىڭىزگە زيان اكەلەتىن جەك كورۋشىلىك، كەك قايتارۋ دەگەن جامان ويلاردان ارىلاسىز.

2. كەز كەلگەن نارسەگە ازىلمەن قاراڭىز. دوستارىڭىزدىڭ اراسىندا كۇلكى سىيلاپ ءجۇرىڭىز. كوپشىلىكتىڭ اراسىندا ىڭعايسىز جاعدايعا قالساڭىز دا، جۇرتتىڭ نازارىن ادەمى كۇلكىڭىزبەن، جىميىسىڭىزبەن جەڭەسىز. كۇلىپ جۇرسەڭىز، قيىندىقتان دا وڭاي قۇتىلاسىز. ىشتەي جاقسىلىققا سەنسەڭىز، سولاي بولارى ءسوزسىز.

3. اينالاڭىزدا بولىپ جاتقانداردان ءتۇڭىلىپ، ۇيدە وتىرا بەرمەڭىز. كوشەدە، دوستارىڭىزدىڭ، تانىستارىڭىزدىڭ اراسىندا كوڭىلىڭىز ءبولىنىپ، كوڭىلسىزدىكتەن قۇتىلاسىز.

4. كۇيبەڭ تىرشىلىگىڭىزگە جاڭالىق ەنگىزىپ وتىرىڭىز، ءوزىڭىز وزگەرىڭىز. جاڭا ىسپەن اينالىسىڭىز، بىرنارسە ۇيرەنىڭىز نەمەسە كيىم كيۋ ستيلىڭىزدى وزگەرتىڭىز. سىزدە بولعان وزگەرىستەر ءۇشىن جاقىندارىڭىز بەن دوستارىڭىز جاقسى پىكىرلەرىن، كومپليمەنتتەرىن بىلدىرسە، ءسىزدىڭ قۋانىپ قالارىڭىز ءسوزسىز. ءسىز جۇرگەن ورتانىڭ وزىڭىزگە ەرەكشە نازار اۋدارۋى كوڭىل- كۇيىڭىزگە اسەر ەتپەي قويمايدى.

5. ۇنەمى جاقسى نارسەلەردى ويلاپ ءجۇرىڭىز. ءتىپتى اۋىر جۇمىس ۇستىندە دە سۇيىكتىڭىزبەن كەزدەسۋدى، دوستارىڭىزبەن كوڭىل كوتەرۋدى ويلاڭىز. قيالعا بەرىلۋگە حوش ءيىستى شىراقتار (ارومالامپا)، اسىرەسە ماندارين، اپەلسين، ليمون، گرەيپفرۋت يىستەرى جاقسى كومەكتەسەدى.

6. ءبىرۋاقىت جۇزۋمەن اينالىسىڭىز. سۋ دەنەنى دەمالتادى، دەنساۋلىققا پايدالى، كوڭىل- كۇيگە جاقسى اسەر بەرەدى.

7. الداعى ماقساتىڭىزدى باعدارلاڭىز. ءبىر ساتكە الداعى كۇندەرىڭىزدىڭ قالاي بولاتىنىن، اتقارىلۋى ءتيىس جۇمىستاردى تۇگەندەپ، الدىڭىزعا قويىلعان ماقساتتارعا ۇمتىلىسىڭىزدىڭ ايقىندىعىن انىقتاپ الىڭىز. ءۇي تازالاعاندا نەدەن باستاۋ كەرەك ەكەنىن جاقسى بىلەتىندىگىڭىز سياقتى، ارمانىڭىزعا جاقىنداتار جولىڭىز دا سىزگە انىق بولادى.

8. ومىرگە جەڭىل قاراڭىز. «ونداي مەندە بولۋ قايدا» دەگەن ويدان ارىلىڭىز. كىشكەنتاي جەتىستىكتەرىڭىزگە قۋانا ءبىلىڭىز. سولاردىڭ ءوزى ۇلكەن باقىتتىڭ باستاۋى بولۋى مۇمكىن. ومىردە ءبارى وڭاي، تەك شىدام كەرەك.

9. ۇنەمى قوزعالىستا بولىڭىز. بۇگىن مۇڭايساڭىز، ەرتەڭ قۋاناسىز. ءبىر كۇننىڭ قايتالانباۋى دا، قايتالانۋى دا وزىڭىزگە بايلانىستى. سوندىقتان مۇڭايىپ، جاتىپ الماڭىز.

10. كوڭىلىڭىزدى تۇسىرگەن جاعدايلاردى تەز ۇمىتىڭىز. كوڭىل- كۇيىڭىز جوق پا، كوڭىلدى مۋزىكا تىڭداڭىز، ءۇي جيناڭىز، سۇيىكتى ىسىڭىزبەن اينالىسىڭىز نە كوڭىلدى كينو كورىڭىز.