قازاقستاندا 10 مىڭ وتباسى جاردەماقىنىڭ جاڭا ءتۇرىن الا باستادى

استانا. قازاقپارات - 1 - شىلدەدەن باستاپ رەسپۋبليكا بويىنشا كامەلەت جاسىنا تولعان I- توپتاعى مۇگەدەك بالالاردىڭ كۇتىمى ءۇشىن جاردەماقانىڭ جاڭا ءتۇرى ەنگىزىلدى، دەپ حابارلايدى قازاقپارات ءتىلشىسى.

ق ر ەڭبەك جانە حالىقتى الەۋمەتتىك قورعاۋ ۆيتسە- ءمينيسترى سۆەتلانا جاقىپوۆانىڭ ايتۋىنشا، قازىرگى كەزدە 10 مىڭ وتباسىعا جاڭا جاردەماقى تولەنە باستادى.

«24 - شىلدەدە تولەمدەر جاسالدى. ءسويتىپ، 10 مىڭ وتباسى ءوز اقشاسىن الدى. جالپى، قازاقستاندا ونداي 14 مىڭ وتباسى بار. بۇگىندە العاشقى تولەمگە ىلىنبەي قالعان 4 مىڭ وتباسى ءوز قۇجاتتارىن جيناپ جاتىر. بىرەۋلەر بالاعا قامقورشىلىق قۇقىعىن راسىمدەپ ۇلگەرمەدى. وسى سياقتى ماسەلەلەر بار. 18 جاستان اسقان بالا I- توپتاعى مۇگەدەك بولسا، ونىڭ زاڭدى قامقورشىسى بولۋى شارت. قازىر ادامدار سوت ارقىلى وسى ماسەلەنى رەتتەۋگە كىرىستى. كەلەسى ايدان باستاپ ولار دا جاردەماقىنىڭ جاڭا ءتۇرىن الا باستايدى»، - دەدى س. جاقىپوۆا ۇكىمەت ۇيىندە وتكەن باسپا ءسوز ءماسليحاتىندا.

 ونىڭ ايتۋىنشا، وتباسىندا اناسى مۇگەدەك بالاسىمەن بىرگە ۇيدە وتىرىپ، وعان كۇتىم جاسايتىن بولسا، جاردەماقى الادى. ال جۇمىس ىستەيمىن دەسە، باسقا باعدارلامالار ارقىلى كومەكشى تارتسا دا بولادى. وعان دا اقشا تولەنەدى.

ايتا كەتەيىك، كامەلەت جاسىنا تولعان I- توپتاعى مۇگەدەك بالالاردىڭ كۇتىمى ءۇشىن جاردەماقانىڭ جاڭا ءتۇرىن ەنگىزۋ مىندەتى پرەزيدەنتتىڭ جولداۋىندا كورسەتىلگەن. وعان سايكەس، اتالعان جاردەماقىنىڭ كولەمى ەڭ تومەنگى كۇنكورىس دەڭگەيىنەن (28850 تەڭگە - اۆت. ) اسپايدى.

اۆتور: ارمان اسقاروۆ