جوعالعان بالالار 10 كۇننەن كەيىن ۇڭگىردەن تابىلدى

  استانا. قازاقپارات - ون كۇننەن بەرى تايلاندتا جوعالعان بالالار بۇگىن تابىلدى. قازىر بۇل توسىن جاعداي بۇكىل الەمنىڭ سايتتارى مەن تەلەارنالارىنان بەرىلىپ جاتىر.

ناقتى ايتار بولساق، تايلاندقا فۋتبول تۋرنيرىنە كەلگەن 12 بالا وزدەرىنىڭ جاتتىقتىرۋشىسىمەن بىرگە قالا شەتىندەگى ۇڭگىردى بارىپ كورمەك بولعان. شىندىعىندا، جەر استىندا ۇزىندىعى جەتى شاقىرىمعا سوزىلاتىن ۇڭگىرگە تومەن تۇسكەن ولار بىرنەشە ساعات وتكەن سوڭ اداسىپ، جەراستى سۋ اپاتىنا تاپ بولعان.

قازىر بالالار مەن جاتتىقتىرۋشىسىنىڭ جاعدايى جاقسى. ون كۇننەن بەرى قاراڭعىلىقتا قالعان بالالار قۇتقارۋشىلار كەلگەن ساتتە الدىمەن توسىرقاعان. ولار سۋىقتاعانىمەن، دەنساۋلىقتارى ءتاۋىر. جەر استىندا 800 مەتر تەرەڭدىكتە ءبىر دوڭەستەۋ جەردى پانالاپ وتىرعان ولاردى قۇتقارۋشىلار تاۋىپ العان. قازىر ولاردى سىرتقا شىعارۋعا دايىندىق شارالارى جۇرگىزىلۋدە. جەر بەتىنە شىققاننان كەيىن بالالارمەن پسيحولوگتار مەن دارىگەرلەر جۇمىس ىستەيتىن بولادى. ولار شامامەن وزدەرى كىرگەن ۇڭگىردىڭ باستاۋىنان 5- 6 شاقىرىم ۇزاپ كەتكەن كورىنەدى. ونىڭ ۇستىنە بالالاردىڭ ءبىرازى جۇزە المايدى، اكۆالانگتى كيىپ، سۋ استىمەن جارىققا شىعۋ دا قيىندىق كەلتىرىپ وتىر. بۇل -  ءبىر. ەكىنشىدەن، ولار تابىلعان ورىننان ۇڭگىردىڭ قۇرعاق جەرىنە دەيىن 200 مەتردى تولىق سۋ باسىپ قالعان. مۇنشا قاشىقتىقتى ءجۇزىپ ءوتۋ ولارعا قيىن. سوندىقتان بالالاردى قۇتقارۋعا ارنايى اكۆالانگ كيگەن اسكەري قۇتقارۋ سالاسىنىڭ ماماندارى بارا جاتىر. قازىر ۇڭگىردىڭ ءدالىز بويىنا اۋاسى بار قوسىمشا بالوندار مەن كەرەكتى ارنايى قۇرال- جابدىقتار قويىلعان. تايلاند تەلەارناسىنىڭ حابارلاۋىنا قاراعاندا، قۇتقارۋ جۇمىستارى بىرنەشە ساعاتقا سوزىلۋى مۇمكىن.

بەرىك بەيسەن ۇلى

تايلاند فۋتبول

«ايقىن»