بيىل قوستانايدا 10 مىڭعا جۋىق جۇمىس ورنى اشىلادى
بۇل تۋرالى وبلىستىق جۇمىسپەن قامتۋدى ۇيلەستىرۋ جانە الەۋمەتتىك باعدارلامالار باسقارماسىنىڭ باسشىسى گۇلنار ابەنوۆا مالىمدەدى، دەپ حابارلايدى قازاقپارات.
باسقارما باسشىسى بيىل وبلىسقا جۇمىس كۇشى مول ايماقتاردان 272 وتباسى (1118 ادام) جانە 25 ورالمان وتباسى (125 ادام) كوشىپ كەلەتىنىن ايتتى. بۇگىنگى تاڭدا قانداستاردى قابىلداۋ كۆوتاسى ءبولىندى، ولارعا ءتيىستى جاردەم جاسالماق.
«جۇمىس ورىندارىن قۇرۋ، سونىڭ ىشىندە تۇراقتى ەڭبەك ەتۋگە كۇش جۇمساۋ ۇنەمى نازارىمىزدا. بيىلعا جوسپارلانعان ون مىڭنان استام جۇمىس ورنىن قۇرۋ %18,3 ورىندالىپ وتىر. ۇكىمەتپەن جاسالعان مەموراندۋم بويىنشا 7,5 مىڭنان اسا تۇراقتى جۇمىس ورنىن قۇرۋ جوسپارلانعان، قازىر ورىندالعانى - 1110 ورىن. ال حالىقتى كەشەندى جوسپار اياسىندا جۇمىسقا تارتۋ جاعىنان رۋدنىي، ارقالىق قالالارى مەن مەڭدىقارا اۋدانى كوش باستاپ تۇر» ، - دەدى گ. ابەنوۆا.
قازىرگى تاڭدا تۇرعىنداردى مەملەكەت تاراپىنان جۇزەگە اسىرىلىپ جاتقان جوبالار بويىنشا جۇمىسقا ورنالاستىرۋ ماڭىزدى ماسەلە بولىپ وتىر. بيىل بۇل باعىت بويىنشا 266 جوبا ارقىلى 1114 ادامدى جۇمىسپەن قامتۋ جوسپارلانعان بولسا، ازىرگە ءۇش ادام عانا جۇمىسقا ورنالاسقان. باسقارما باسشىسى مۇنى مەملەكەتتىك ساتىپ الۋ بايقاۋلارىنىڭ ەندى عانا جۇرگىزىلىپ جاتقانىمەن ءتۇسىندىردى.
ال وبلىس اكىمى ارحيمەد مۇحامبەتوۆ تۇرعىنداردى تۇراقتى جۇمىسقا ورنالاستىرۋ ماسەلەلەرىنە شيراي ءتۇسۋدى تاپسىردى.
«7,5 مىڭ ادامدى تۇراقتى جۇمىسقا ورنالاستىرۋ وڭاي ەمەس. سوندىقتان جان- جاقتى مۇمكىندىكتەردى قاراستىرىڭىزدار. قۇرىلىس، جول، باسقا دا جىلدىڭ جىلى مەزگىلىندە ورىندالاتىن مەردىگەرلىك جۇمىستار بار. ولاردى تۇراقتى دەپ ايتۋعا كەلمەيدى، ۋاقىتشا جۇمىس. شاعىن جانە ورتا كاسىپكەرلىك، ونەركاسىپ، اۋىل شارۋاشىلىعى سالالارىن تۇراقتى دەپ تولىق ايتا الامىز. مىنە، وسى جاعىنا ءمان بەرىڭىزدەر» ، - دەدى ا. مۇحامبەتوۆ.
بەلگىلى بولعانداي، بيىل ناتيجەلى جۇمىسپەن قامتۋ باعدارلاماسىنا قاتىسۋعا 8,5 مىڭنان استام ادام ءوتىنىش ءبىلدىردى. باعدارلامانىڭ ءبىرىنشى باعىتى بويىنشا مىڭ جارىمنان اسا ادام قىسقا مەرزىمدى وقۋ كۋرستارىن مەڭگەرىپ شىعۋعا كىرىسىپ كەتكەن. ەندىگى ماسەلە - وقۋىن اياقتاعانداردى جۇمىسقا ورنالاستىرۋ. ال بيىل التىنسارين، امانكەلدى، جانكەلدين جانە ناۋىرزىم اۋداندارىندا تراكتورشى، دانەكەرلەۋشى، اسپازدىق ماماندىقتارى بويىنشا 85 ادامدى ءموبيلدى وقۋ ورتالىقتارى ارقىلى دايارلاۋ قاراستىرىلعان. قازىر ولاردىڭ 42 سى كۋرستى اياقتادى.
