شىمكەنتتە تولە ءبي تۋرالى 10 سەريالى فيلم تۇسىرىلەدى
بۇل تۋرالى وڭتۇستىك قازاقستان وبلىسى اكىمدىگىنىڭ باسپا ءسوز قىزمەتى حابارلادى.
باسپا ءسوز مالىمەتتەرىنە قاراعاندا، مەملەكەت باسشىسى ن. نازاربايەۆ «بولاشاققا باعدار: رۋحاني جاڭعىرۋ» باعدارلامالىق ماقالاسىندا «مادەني ونىمدەرىمىز تەك كىتاپ تۇرىندە ەمەس، ءارتۇرلى مۋلتيمەديالىق تاسىلدەرمەن دە شىققانى ابزال» دەپ اتاپ وتكەن. وسىعان وراي وڭتۇستىك قازاقستان وبلىسىندا ءوڭىر باسشىسى جانسەيىت تۇيمەبايەۆتىڭ قولداۋىمەن وتكەن جىلى بالالارعا ارنالعان تاريحي-تانىمدىق 3 انيماتسيالىق فيلم مەن وبلىستىڭ كيەلى جەرلەرىن ناسيحاتتايتىن كوپ سەريالى تەلەحيكايا ءتۇسىرىلدى.
اتاپ ايتقاندا، «كۇش اتاسى - قاجىمۇقان»، «كيەلى قازىعۇرت»، «وتىراردى قورعاۋ» سىندى مۋلتفيلمدەرى مەن 10 سەريالى «كونە جەتىگەننىڭ سىرى» اتتى فيلمى ءتۇسىرىلدى. اتالعان تۋىندىلاردى «وڭتۇستىك فيلم» مەن «ساق» كينوستۋدياسى دايىندادى.
قازىرگى تاڭدا شەتەلدىك تەلەارنالار قىزىعۋشىلىق تانىتىپ وتىرعان تىڭ دۇنيەلەردىڭ الداعى ۋاقىتتا استانا، الماتى قالالارى مەن ەلىمىزدىڭ بارلىق وبلىستارىندا تانىستىرىلىمى ءوتىپ، كورەرمەنگە جول تارتاتىن بولادى. 16- ناۋرىز بەن 20- مامىر ارالىعىندا رەسپۋبليكانىڭ بارلىق وبلىس ورتالىقتارىنداعى مادەنيەت ۇيلەرى مەن كينوتەاترلارىندا «وتىراردى قورعاۋ»، «كۇش اتاسى - قاجىمۇقان»، «كيەلى قازىعۇرت»، انيماتسيالىق فيلمدەرى، «كونە جەتىگەننىڭ سىرى» تەلەسەريالى كورسەتىلەدى.
«مۇنىڭ ءوزى وسكەلەڭ ۇرپاقتىڭ بويىنا وتانشىلدىق، تۋعان جەرگە دەگەن ادالدىق سىندى قاسيەتتەردى دارىتىپ، ءتول تاريحتى بويلارىنا سىڭدىرۋگە سەپ بولماق»، - دەلىنگەن حابارلامادا.
سونىمەن قاتار، بۇل جوبا اعىمداعى جىلى دا جالعاسىن تاۋىپ وتىر. وبلىس باسشىسىنىڭ باستاماسىمەن اتاقتى تولە بابانىڭ تولىق ءومىربايانىنا نەگىزدەلگەن 10 سەريالى «تولە ءبي» كينو جوباسى جانە ءۇش ءجۇزدىڭ باسىن قوسقان كيەلى مەكەنگە ارنالعان «ورداباسى - بىرلىكتىڭ تۋى» اتتى انيماتسيالىق فيلمى دايىندالادى.
سونداي-اق قازاق حاندىعىنىڭ ورداسى بولعان، حالقىمىزدىڭ ۇلى تۇلعالارى ماڭگىلىك مەكەن تاپقان كيەلى جەردى جاس بالعىندارعا تانىستىرۋعا ارنالعان «تۇركىستان» جانە ۇلى جىبەك جولى بويىنداعى تاريحي قالالاردىڭ ءبىرى، الەمدەگى ەكىنشى ۇستاز اتانعان ءال فارابيدىڭ تۋعان جەرى وقسىز قالاسىنىڭ تاريحى مەن ۇلى عالىم جايلى «وقسىز وقيعاسى» انيماتسيالىق فيلمدەرى قالىڭ كوپشىلىك نازارىنا ۇسىنىلاتىن بولادى.
