نۇرلى جەر: ورالدا 10 تۇرعىن ءۇي بوي كوتەرەدى

ورال. قازاقپارات - ورالدا تۇرعىن ۇيلەر قۇرىلىسىنا 8 ميلليارد تەڭگە قاراستىرىلىپ وتىر.

بۇل تۋرالى تۇرعىندارمەن ەسەپتىك كەزدەسۋىندە قالا اكىمى مۇرات مۇقايەۆ ءمالىم ەتتى، دەپ حابارلايدى «قازاقپارات» ءتىلشىسى.

وتكەن جىلعى اتقارىلعان جۇمىستار مەن الدا تۇرعان مىندەتتەرگە توقتالعان شاھار باسشىسىنىڭ ايتۋىنشا، 2582 پاتەردى قۇرايتىن 17 ءۇي بويىنشا جوبالىق-سمەتالىق قۇجاتتاما جاسالدى، سونىڭ 10 ى زاچاگان كەنتىندە بوي كوتەرمەك. بۇل ۇيلەردىڭ قۇرىلىسى 2018-2019 -جىلدارعا جوسپارلانعان.

ناقتىراق ايتقاندا، «نۇرلى جەر» باعدارلاماسى اياسىندا زاچاگان كەنتىندە جالپى اۋدانى 81 مىڭ شارشى مەتر قۇرايتىن 10 تۇرعىن ءۇي (1566 پاتەر) بوي كوتەرمەك. وسىلايشا، زاچاگان كەنتىندەگى ۇيلەر قۇرىلىسى مارەگە جەتىپ، اۋماقتى اباتتاندىرۋ جۇمىستارى جاسالادى.

جالپى، ورال قالاسى ەكى باعىتتا دامۋدا. سونىڭ ءبىرى - سولتۇستىك- شىعىس جاعى. جوباعا سايكەس اتالعان اۋدان 109 گەكتاردى قۇرايتىن بولادى. وسى اۋداندا 27 كوپ قاباتتى تۇرعىن ءۇي، 1 مەكتەپ پەن 1 بالاباقشا، سونىمەن بىرگە دەنە- شىنىقتىرۋ ساۋىقتىرۋ كەشەنى جانە باسسەيننىڭ قۇرىلىستارى جوسپارلانعان.

ينجەنەرلىك- كوممۋنيكاتسيالىق ينفراقۇرىلىمدارمەن قامتاماسىز ەتۋ جۇمىستارى 2016 -جىلى باستاۋ الىپ، 2017 -جىلى جالعاسىن تاپتى. اتاپ ايتقاندا، 4,3 ك م كارىز جەلىلەرى، 5,6 ك م سۋمەن قامتۋ جەلىلەرى جانە 27,6 ك م ەلەكترمەن جابدىقتاۋ جەلىلەرى جۇرگىزىلدى. اتالعان اۋداندى كۆارتالىشىلىك جولدارمەن، سۋ اكەتۋ كانالدارى جانە جارىقتاندىرۋمەن قامتاماسىز ەتۋ بويىنشا جوبالىق- سمەتالىق قۇجاتتاما دايىندالىپ، بيىل قۇرىلىس جۇمىستارىن باستاۋ جوسپارلانىپ وتىر. سونىمەن بىرگە ينجەنەرلىك جەلىلەردى جۇرگىزۋ ماقساتىندا گازبەن قامتۋدىڭ جوبالىق- سمەتالىق قۇجاتتاماسى دايىندالۋدا.

قازىرگى ۋاقىتتا وسى اۋدان بويىنشا 7 ءۇيدىڭ جوبالىق- سمەتالىق قۇجاتتاماسى دايىندالىپ جاتىر، سونىڭ ىشىندە 2 ءۇي بويىنشا قۇرىلىس- مونتاجداۋ جۇمىستارىن باستاۋ كوزدەلۋدە.

تۇتاستاي العاندا، 2017 -جىلدان باستاپ ورال قالاسى بويىنشا 17 كوپ پاتەرلى تۇرعىن ءۇي قۇرىلىسى (2433 پاتەر، جالپى الاڭى - 143,7 مىڭ شارشى مەتر) جۇرگىزىلسە، سونىڭ 9 ى تاپسىرىلدى. قالعان سەگىز ۇيدە قۇرىلىس- مونتاج جۇمىستارى جالعاسۋدا. وتكەن جىلى قۇرىلىس سالاسىنا 7,2 ميلليارد تەڭگە جۇمسالدى، بۇل الدىڭعى جىلعىدان (6,1 ميلليارد تەڭگە) 18 پايىزعا كوپ.

تاعى ءبىر ماڭىزدى ماسەلە - ورالدا قوس بىردەي جىلۋ جەلىسىن قايتا قۇرۋعا ۇلتتىق قوردان 1,3 ميلليارد تەڭگە نەسيە ءبولىندى. اتالمىش قوس ۋچاسكە (№2 جانە №7) قالا ورتالىعىندا ورنالاسقان. ودان كەيىن تاعى ەكى ءىرى جىلۋ جەلىسىن (ءارقايسىسى 350 ميلليون تەڭگەدەن) جوندەۋ كەرەك. بۇلاردىڭ جوبالاۋ قۇجاتى جاسالدى، كوپ كەشىكپەي جۇمىسقا كىرىسۋ كوزدەلۋدە. سوندا قالادا جىلۋ جەلىلەرىن جاڭعىرتۋ ماسەلەسى تولىقتاي شەشىلەدى.

«اقجايىق» شاعىناۋدانىندا ينجەنەرلىك جەلىلەردى (سۋ مەن ەلەكتر قۋاتى) تارتۋعا رەسپۋبليكالىق بيۋدجەتتەن 1,2 ميلليارد تەڭگە (بارلىق قارجىنىڭ 40 پايىزى) قارالعان. بۇل جوبالاردىڭ جالپى قۇنى - 2,9 ميلليارد تەڭگە.

قالا جولدارىن جوندەۋ بيىل دا جالعاسىن تابادى. ۇزىندىعى 33 شاقىرىمنان استام 24 كوشە جولىن جوندەۋ ويلاستىرىلسا، سونىڭ تەڭ جارتىسى جەر قويناۋىن پايدالانۋشىلار ەسەبىنەن جۇرگىزىلەدى. وعان قوسا اۆتوكولىك قوزعالىسىنا ىڭعايلى بولۋى ءۇشىن ءتورت كوشە قيىلىسىن كۇردەلى جوندەۋ جوسپارلانىپ وتىر. سونداي- اق مۇناي بازاسى اۋدانىنداعى كوپىر قۇرىلىسىنىڭ جوبالاۋ- سمەتالىق قۇجاتتاماسى جاسالۋدا. ول دەپو كوپىرى اياقتالىسىمەن باستالاتىن بولادى.

بيىلعى قالا بيۋدجەتى - 27,1 ميلليارد تەڭگە، سونىڭ 23 پايىزى نەمەسە 6,1 ميلليارد تەڭگەسى دامۋ بيۋدجەتى بولىپ سانالادى.

قالا اكىمىنىڭ ەسەپتىك جيىنىنا ءوڭىر باسشىسى التاي كولگىنوۆ قاتىسىپ، ەلباسى تاپسىرمالارىنا سايكەس الدا تۇرعان ماقسات- مىندەتتەردى اتاپ كورسەتتى.

ەسكە سالا كەتەيىك، وبلىس اكىمىنىڭ تۇرعىندارمەن ەسەپتىك كەزدەسۋى 16 -اقپان كۇنى وقۋشىلار جانە جاستار سارايىندا وتەتىن بولادى.