شىمكەنتتە 10 جاسار قىز ماتەماتيكالىق ەسەپتەردى شەشەتىن كيىز ءۇي ويلاپ تاپتى
4-سىنىپ وقۋشىسى ءسابينا مىرزابايەۆا كيىز ءۇي قۇرىلىمدارى ارقىلى ماتەماتيكالىق ەسەپتەردى قۇرۋ جانە ولاردى شەشۋ جولىن تاپتى.
بۇل تۋرالى TVK ارناسىنا سىلتەپ Stan.kz حابارلايدى.
جۋىردا جاس عالىمدى قالالىق ءبىلىم ءبولىمىنىڭ باسشىسى جانات تاجيەۆا قابىلدادى.
ءسابينا مىرزابايەۆانىڭ ەرەكشە جوباسى «ەرتوستىك» دەپ اتالادى. بۇل اتاۋدى ءتورتىنشى سىنىپ وقۋشىسى حالىق ەرتەگىسىنىڭ نەگىزىندە العان. وسىلايشا جەتكىنشەك ماتەماتيكا مەن ادەبيەتتى توعىستىرۋدىڭ جولىن تاپقان. «ەسەپتەۋىش- كيىز ءۇي» رەسپۋبليكالىق «زەردە» جاس عالىمدار بايقاۋىندا ۇزدىك تۋىندىلار قاتارىنان تابىلدى.
«كيىز ءۇيدىڭ 12 قاناتى بار. ونىڭ ءبىر جاعى - جاز، ال ەكىنشى جاعى - قىس مەزگىلى دەپ ەلەستەتىپ كورەيىكشى. كەرەگەنىڭ 30 ساڭىلاۋى بار. ونى ءار ايداعى 30 كۇنگە تەڭەستىرەيىك. ەگەر 12 قاناتتى 30 ساڭىلاۋعا كوبەيتسەك، جىلدىڭ 360 كۇنى شىعادى. ال قالعان 5 كۇن - ول ءبىزدىڭ كيىز ءۇيدىڭ قوناقتارى. مەنىڭ كۇنتىزبەمدە شاڭىراقتىڭ بەلگىسى «پليۋس»، - دەيدى جاس عالىم.
«بۇل جوبا ماتەماتيكالىق ەسەپتەردى قۇراستىرىپ، ولاردى شەشۋ جولىن تابۋعا كومەكتەسەدى. مەن بۇل جوبامەن ءبىر جىل جۇمىس ىستەدىم. «زەردە» بايقاۋىنا قاتىسۋ مۇمكىندىگى قاشان تۋادى ەكەن دەپ اسىعا كۇتتىم. سونداي- اق، ۇزدىك جۇمىستارىن ۇسىنعان باقتالاستارىمدى اتاپ وتكىم كەلەدى»، - دەيدى №65 ورتا مەكتەپ وقۋشىسى ءسابينا مىرزابايەۆا.
ايتا كەتەيىك، بيىل «زەردە» بايقاۋى ون ءۇشىنشى رەت اقمولا وبلىسىنىڭ شۋچينسك ايماعىندا ۇيىمداستىرىلدى. جاس عالىمدار بايگەسىنە 18 وڭتۇستىك قازاقستاندىق وقۋشى قاتىستى. ولاردىڭ 9 ى لاۋرەات اتاندى. قالالىق ءبىلىم ءبولىمىنىڭ باسشىسى جەڭىمپازداردى قابىلداپ، ولاردى جەكەلەي قۇتتىقتادى.
«بۇل تەك ۇلكەن جولدىڭ باستاماسى. ءالى كوپتەگەن بايقاۋلاردا باقتارىڭدى سىناپ كورەسىڭدەر. مىناداي جاستارىڭدا جەتىستىككە جەتسەڭدەر، بولاشاقتارىڭ جارقىن بولارى ءسوزسىز»، - دەدى جانات تاجيەۆا.
كەزدەسۋ سوڭىندا بالالارعا ماقتاۋ گراموتالارى تاپسىرىلدى. جاس عالىمدار جوبالارىن ءارى قاراي دامىتۋعا جانە باسقا دا جوبالارمەن اينالىسۋعا ۋادە بەردى.
