قازاقستاندىق 10 جاستاعى بالا كارىس مۋلتسەريالىنا ساۋندترەك جازدى
ونىڭ داۋىسىن قازاقستاندىقتار Carrie Kids Song مۋلتسەريالىنان تىڭداي الادى، دەپ حابارلايدى قازاقپارات ءتىلشىسى.
بۇرىن بۇل مۋلتسەريال اعىلشىن، قىتاي، يندونەزيا تىلدەرىندە شىققان بولاتىن. انيماتسيالىق سەريال جاقىندا ت م د ەلدەرىندە ورىس تىلىندە كورسەتىلەتىن بولادى.
«مەن ومىرىمدە ءبىرىنشى رەت مۋلتفيلم ساۋدنترەگىن دىبىستادىم. مەن ءۇشىن تەڭدەسسىز تاجىريبە بولدى. شەتەلدىك دىبىس رەجيسسەرلەرىمەن جۇمىس جاسادىم. ولار ۇنەمى مەنىڭ داۋسىمدى ماقتاپ، تاڭ قالۋمەن بولدى» ، - دەدى جاس ءانشى.
جاس دارىننىڭ تالانتىنا تاڭ قالعان جوبا اۆتورلارى ءدانييلدى سەريالاردىڭ ءبىرىنىڭ ءتۇسىرىلىم جۇمىستارىنا قاتىستىردى.
«8 كۇندە بىرنەشە ءان جازدىق. ءوزى كىشكەنتاي بولسا دا داۋسى كەرەمەت ەكەن. قازاقستاندا دا ونىڭ جولى بولىپ، دارىنى جوعارى باعالانسا دەگەن تىلەگىم بار» ، - دەدى كورەيا دىبىس رەجيسسەرى حو دجۋنەن.
كومپانيا وكىلدەرى بولاشاقتا سەريال جالعاسىن تاۋىپ جاتسا، دانييل ءيۋندى سەريال كەيىپكەرلەرىنىڭ داۋسىن دىبىستاۋعا شاقىرماق.
ايتا كەتۋ كەرەك، 10 جاستاعى ونەرپاز بىلتىر قازاقستاندا وتكەن «گولوس كازاحستانا. دەتي» بايقاۋىنىڭ جەڭىمپازى اتانعان بولاتىن.
