مەملەكەت باسشىسى ەل الدىنداعى 10 نەگىزگى مىندەتتى اتادى
دەپ حابارلايدى «قازاقپارات» ح ا ا ءتىلشىسى.
«مەن جۇزەگە اسىرۋىمىز كەرەك 10 مىندەتتى كورىپ وتىرمىن. ولاردىڭ مازمۇنى تۋرالى قىسقاشا ايتىپ وتسەم. ءبىرىنشىسى - قازاقستاندىق يندۋستريا جاڭا تەحنولوگيالاردى ەنگىزۋدە فلاگمان بولا ءبىلۋى كەرەك. ءبىز ونەركاسىپكە ءوندىرىس پروتسەستەرىن سيفرلاندىرۋ مەن زاماناۋي بيزنەس- مودەلدەردى يگەرۋ ارقىلى ەڭبەك ءوندىرىسىنىڭ دەڭگەيىن كوتەرۋگە ءتيىسپىز. ەكىنشىدەن، رەسۋرستىق الەۋەتتى قولدانۋ تيىمدىلىگىن بارىنشا جاقسارتۋ كەرەك. قازىرگى ۋاقىتتا اقپاراتتىق- تەحنولوگيالىق شەشىمدەردى ەنگىزۋ تالاپ ەتىلىپ وتىر. بۇل شىعارىلاتىن ونىمدەردىڭ ۇلەسىن ارتتىرۋعا ولاردى قايتا وڭدەۋ تەرەڭدىگىن مەڭگەرۋگە، سونىمەن بىرگە ەنەرگيانى ۇنەمدەۋگە جانە ءوندىرىستىڭ ەكولوگياسىنىڭ جاقسارۋىنا مۇمكىندىك بەرەدى»، - دەدى نۇرسۇلتان نازاربايەۆ.
مەملەكەت باسشىسى بارشا قازاقستاندىقتارعا جۇكتەلىپ وتىرعان مىندەتتىڭ ءۇشىنشىسى - اگروونەركاسىپ كەشەنىن جاڭا تەحنولوگيالىق دەڭگەيگە كوتەرۋ ەكەنىن اتاپ ءوتتى. نۇرسۇلتان نازاربايەۆتىڭ ايتۋىنشا، بۇل اۋىل شارۋاشىلىعىندا ەڭبەك ونىمدىلىگى مەن وڭدەلگەن ءونىم ەكسپورتىن تۇبەگەيلى ارتتىرۋعا سەرپىن بەرەدى.
«ءتورتىنشى - ترانسپورت پەن لوگيستيكالىق ينفراقۇرىلىمدى ودان ارى دامىتۋ. سيفرلىق تەحنولوگيالاردى ەنگىزۋ مەن ينتەللەكتۋالدى ترانسپورت جۇيەسىن قۇرۋ جۇك تاسىمالداۋ مەرزىمدەرىن قىسقارتۋعا جانە ترانزيتتەن تۇسەتىن تابىستاردى ەسەلەۋگە مۇمكىندىك بەرەدى. بەسىنشى - ت ۇ ك ش جانە قۇرىلىس سالاسىندا زاماناۋي تەحنولوگيالاردى قولدانۋ. قۇرىلىس جۇرگىزۋدىڭ جاڭا ادىستەرى، عيماراتتىڭ ەنەرگيانى ۇنەمدەۋ تالابىن كوتەرۋ، ينفراقۇرىلىمداردى ينتەللەكتۋالدىق جۇيەمەن باسقارۋ - قازاقستاندىقتاردىڭ ءومىر ساپاسىن ارتتىرۋعا جول اشادى»، - دەيدى نۇرسۇلتان نازاربايەۆ.
مەملەكەت باسشىسى قازاقستانداعى قارجى سەكتورىنىڭ «قايتا جاندانۋى» - 10 مىندەتتىڭ التىنشىسى ەكەنىن اتادى.
«بانكتىك جۇيەلەردى دامىتۋ باقىلاۋ جولىمەن جانە قاراپايىم ازاماتتاردىڭ مۇددەسى ءۇشىن جۇرگىزىلۋى كەرەك. بانكتەرگە يەلىك ەتەتىن ادامداردىڭ جاۋاپكەرشىلىگىن ارتتىرۋدىڭ ماڭىزى زور. جەتىنشى - ادام كاپيتالىنىڭ جاڭا ساپاسى. ءبىلىمنىڭ بارلىق جۇيەسى زاماناۋي تالاپتارعا جانە ەكونوميكانىڭ بارىق قاجەتتىلىگىنە جاۋاپ بەرۋى ءتيىس. سەگىزىنشى - بۇل ءتيىمدى مەملەكەتتىك باسقارۋ. سيفرلىق تەحنولوگيالار بيزنەستى قايتا رەتتەۋگە، مەملەكەت تاراپىنان كورسەتىلەتىن قىزمەت پەن مەملەكەتتىك قولداۋدىڭ ساپاسىن ارتتىرۋعا، ازاماتتاردىڭ قاجەتتىلىگىن بارىنشا ەسەپكە الۋعا مۇمكىندىك بەرەدى»، - دەدى نۇرسۇلتان نازاربايەۆ.
مەملەكەت باسشىسى سونىمەن بىرگە، توعىزىنشىدان زاڭنىڭ قۇزىرەتىلىگى مەن جەمقورلىقپەن كۇرەس مەملەكەتتىك ساياساتتىڭ باسىم باعىتتارىنىڭ ءبىرى بولىپ قالاتىنىن ايتىپ ءوتتى. ونىنشى مىندەت رەتىندە «سمارت سيتي» تەحنولوگياسىنىڭ ەنگىزىلۋى ءوسىپ بارا جاتقان قالالاردىڭ ماسەلەلەرىن ءتيىمدى تۇردە شەشۋگە جول اشىپ، ينۆەستورلاردىڭ قىزىعۋشىلىعىن تۋعىزاتىنىن جەتكىزدى.
«ءبىزدىڭ ءبارىمىز بۇگىنگى كۇنى وسى ون تاپسىرمانى ورىنداۋعا كۇش سالۋىمىز كەرەك. جولداۋدىڭ تولىق ماتىنىندە ولاردىڭ بارلىعى كورسەتىلەدى»، - دەدى نۇرسۇلتان نازاربايەۆ.
اۆتور: ايان بەكەن ۇلى
