اقتوبەنىڭ 10 جەتىستىگى: ديماش قۇدايبەرگەن. جەرلەستەر فورۋمى. كوتتەدجدەر مەن تاۋنحاۋستار - فوتو

بيىل ونەركاسىپ ءونىمىنىڭ ءوسىمى 5 پايىزدى قۇرادى. ءوندىرىس، قۇرىلىس سالاسى قارقىندى دامىپ، مەملەكەتتىك-جەكەشەلىك سەرىكتەستىك اياسىندا الەۋمەتتىك نىساندار سالىندى. بيزنەستىڭ الەۋمەتتىك جاۋاپكەرشىلىگى كۇشەيىپ، ءىرى مادەني وشاقتار پايلانۋعا بەرىلدى. قازاقپارات اقتوبە وبلىسىنىڭ 10 جەتىستىگىن تىزبەكتەيدى.

اقتوبەلىك ءانشى ديماش قۇدايبەرگەن «I am singer»  بايقاۋىندا جۇلدەگەر اتاندى

قىتايدا وتكەن «I am singer»  بايقاۋىندا باعى جانعان ءانشى ديماش قۇدايبەرگەن الەمگە قازاق اتىن تانىتتى. ول ІІ- ورىن الىپ، الەمنىڭ اتاقتى انشىلەرىنىڭ قۇتتىقتاۋىن قابىلدادى. ديماش قۇدايبەرگەن اقتوبە وبلىسىندا دۇنيەگە كەلگەن. ول 5 جاسىنان باستاپ مۋزىكا مەكتەبىنە بارىپ، ارنايى ساباق الدى. دومبىرا تارتۋدى كۇيشى، زەرتتەۋشى جايلاۋ اسىلحانوۆتان ۇيرەندى. ۇستازى مارات ءايتىموۆ الەمگە تانىلا ءتۇسىپ، ودان ءتالىم الۋدى قالايتىن ستۋدەنتتەر سانى ارتتى. ال ديماشتىڭ فاناتتارى ونىڭ ءبىلىم العان مۋزىكالىق كوللدجىندە بولىپ، ۇستازدارىمەن تانىستى. قازىرگى كەزدە ديماش قۇدايبەرگەن قىتايداعى قالالاردى ءوزىنىڭ جەكە كونتسەرتتەرىن بەرىپ ءجۇر.

الەمنىڭ 21 ەلىنەن 300 دەن استام اقتوبەلىك جينالدى

 اقتوبە وبلىسىندا «تۋعان جەر» رەسپۋبليكالىق فورۋمى ءوتتى. وعان الەمنىڭ ءار تۇكپىرىندە جۇرگەن 300-دەن استام اقتوبەلىك قاتىستى. فورۋم اياسىندا اكادەميك جاقسىلىق دوسقاليەۆ باستاعىن توپ 12 جاستاعى قىزدىڭ باۋىرىن اۋىستىرۋ وتاسىن جاسادى. ال ءانشى ديماش قۇدايبەرگەن تۋعان جەرىندە وتكەن فورۋمعا ارنايى قاتىستى. دەگەنمەن فاناتتارىنىڭ جانىندا جۇرگەن ءانشى رەيستەن كەشىگىپ، ول ارنايى چارتەرلىك رەيسپەن ۇشىپ كەلدى.

ەكسپو كورمەسىندەگى جاڭا تەحنولوگيانى وندىرىسكە ەنگىزۋ جۇمىسى جۇرگىزىلەدى

 

اقتوبە وبلىسى ەكسپو كورمەسىندە كورسەتىلگەن جاڭا تەحنولوگيالاردى وندىرىسكە ەنگىزەتىن وڭىرلەردىڭ كوشىن باستادى. جوسپار بويىنشا وندىرىسكە وزىق تەحنولوگيانى ەنگىزۋ ءۇشىن 43 ميلليارد تەڭگە جۇمسالادى. جوبالاردى قولدانىسقا ەنگىزۋ كەزىندە جاپونيا، گەرمانيا، فينليانديا، يزرايل، پولشا، ۇلى بريتانيا، سلوۆاكيا ەلدەرىنىڭ جەل مەن كۇننەن قۋات الۋ جولدارى وندىرىستە پايدالادى.

اقتوبە- اتىراۋ تاسجولىنىڭ قۇرىلىسى باستالدى

اقتوبە- اتىراۋ تاسجولىن سالۋ جۇمىسى 2018-2020 -جىلدارى جۇرگىزىلەدى. جول قۇرىلىسى كەزىندە جەرگىلىكتى ماتەريالدار پايدالانىلادى. اقتوبە وبلىسى اۋماعىنداعى 329 شاقىرىمنىڭ 79 شاقىرىمى 1- كاتەگوريامەن سالىنادى. اقتوبە- اتىراۋ تاسجولىن تەك جەرگىلىكتى مەردىگەرلەر ەمەس، يتاليا، ازەربايجان، تۇركيا، كورەيا ەلدەرىنىڭ قۇرىلىس كومپانيالارى كەلدى. بارلىعى 3 مىڭعا جۋىق ادام جۇمىس ىستەيدى. جول قۇرىلىسىنا قاجەتتى قارجى ازيا دامۋ بانكى مەن يسلام بانكىنەن الىندى.

كوتتەدجدەر مەن تاۋنحاۋستار

اقتوبەدە «نۇرلى جەر» باعدارلاماسى اياسىندا كوتتەدجدەر مەن تاۋنحاۋستار سالىندى. بارلىعى 194 كوتتەدج بەن 20 تاۋنحاۋس پايدالانۋعا بەرىلدى. بۇل ۇيلەردىڭ قۇرىلىسى كەزىندە جەرگىلىكتى ماتەريالدار پايدالانىلدى. پاتەر تۇرعىن ءۇي قۇرىلىس جيناق بانكىندە ەسەپشوتى بار، باسپانانىڭ 30 پايىزىن تولەي الاتىن جانە جەر تەلىمى كەزەگىندە تۇرعان ادامدارعا بەرىلدى.

ونەر ورتالىعى مەن شىعارماشىلىق اكادەمياسى

اقتوبەدە بيزنەستىڭ الەۋمەتتىك جاۋاپكەرشىلىگى اياسىندا 1200 ورىندى ونەر ورتالىعى سالىندى. «سنپس- اقتوبەمۇنايگاز» ا ق وڭىردە تەڭدەسى جوق ەڭ ۇلكەن مادەني وشاقتى سىيعا تارتۋ ەتتى. ال «قازحروم» تۇك» ا ق شاعىرماشىلىق اكادەمياسىن سالىپ بەردى. بۇل اكادەميادا مەكتەپ وقۋشىلارىنا ءتۇرلى ۇيىرمەلەر اشىلعان. جاڭا ورتالىققا مەملەكەت باسشىسى نۇرسۇلتان نازاربايەۆ بارىپ، ونەرلى بالالارمەن تىلدەستى. ال ونەر ورتالىعىنا وبلىستىق فيلارمونيا ۇجىمى قونىستاندى. مۇنداي مادەني شارالار ءجيى ۇيىمداستىرىلادى.

مەملەكەتتىك- جەكەشەلىك سەرىكتەستىك: مەكتەپ، بالاباقشا، ەمدەۋ جانە مادەني ورتالىق

اقتوبەدە مەملەكەتتىك- جەكەشەلىك سەرىكتەستىك اياسىندا بىرنەشە الەۋمەتتىك نىسان سالىندى. حوككەي ءمودۋلى، جەكپە- جەك سارايى، وفتالمولوگيالىق ورتالىق پايدالانۋعا بەرىلدى. «جۇبانوۆتار الەمى» مادەنيەت ورتالىعى وڭىردەگى اقىن- جازۋشىلار مەن ونەر ادامدارىنىڭ جينالاتىن، پىكىر الماساتىن وشاعىيەۆ اينالادى.

الەم چەمپيوناتىنداعى جەڭىمپازدار: مەيرامبەك ايناعۇلوۆ پەن ەسەت قۋانوۆ

مەيرامبەك ايناعۇلوۆ پاريجدە وتكەن الەم چەمپيوناتىندا كۇمىس جۇلدە الدى. بۇل اقتوبەنىڭ سپورت تاريحىندا بالۋانداردىڭ ەڭ ۇزدىك جەڭىسى بولدى. 59 كەلى سالماقتا 5 بەلدەسۋ وتكىزىپ، تورتەۋىن جەڭگەن بالۋاننىڭ ارمانى - وليمپيادا چەمپيونى اتانۋ. ال الەم چەمپيوناتىندا سامبودان التىن مەدال العان ەسەت قۋانوۆ دزيۋدوعا اۋىسۋى مۇمكىن ەكەنىن جاسىرمادى. جىلدىڭ ۇزدىك سپورتشىلارىن اقتوبە وبلىسىنىڭ اكىمى بەردىبەك ساپاربايەۆ قۇتتىقتاپ، ولارعا پاتەر مەن اۆتوكولىك سىيعا بەردى.

ەسەت باتىردىڭ 350 جىلدىعى تويلاندى

بيىل ەسەت كوكى ۇلىنىڭ تۋعانىنا 350 جىل تولدى. ەسەت باتىر كوكى ۇلى ۇنەمى ءابىلقايىر حاننىڭ قاسىندا بولىپ، اقىل- كەڭەسىن بەردى، حان مەن حالىق اراسىندا دانەكەر بولدى. اقتوبەنىڭ بەستاماق اۋىلىندا باتىرعا ارنالعان ەسكەرتكىش اشىلىپ، اس بەرىلدى.

اقتوبەدە ستۋدەنتتەردى تەگىن تاماقتاندىراتىن ءدامحانا بار

اقتوبەلىك كاسىپكەر ەربول بايجارقىنوۆ ستۋدەنتتەردى تەگىن تاماقتاندىراتىن ءدامحانا اشىپ قويدى. مۇندا ستۋدەنتتىك بيلەت ارقىلى تەگىن تاماقتانۋعا بولادى. اس مازىرىندە سورپا، ەتتى ماكارون، شاي مەن قانت، نان بار. بۇل اسحانادا ءار سەنبى سايىن ستۋدەنتتەر جەرگىلىكتى كاسىپكەرلەرمەن كەزدەسىپ، ولاردان بيزنەستى باستاۋ جولىن ۇيرەنە الادى. «ءوز تاجىريبەڭمەن ءبولىس!» اتتى كەزدەسۋ دە تەگىن وتەدى.