الەمدە 10 ميلليون ادامنىڭ ازاماتتىعى جوق
استانا. قازاقپارات - الەم بويىنشا 10 ميلليون ادامنىڭ ەشبىر ەلدە ازاماتتىعى جوق. ال رەسمي دەرەككە سۇيەنسەك، ولاردىڭ سانى 3 ميلليوننان اسپايدى.
قۇجاتى بولماعاندىقتان، مۇنداي جانداردىڭ قۇقىعى قورعالمايدى جانە تۇراقتى جۇمىسقا دا ورنالاسپايدى. مۇنداي مالىمدەمەنى بىرىككەن ۇلتتار ۇيىمىنىڭ بوسقىندار ءىسى جونىندەگى اگەنتتىگى حابارلادى.
مۇلدە ازاماتتىق الماعان ۇلتتىڭ ءبىرى - روحيندجا حالقى. تامىز ايىنان بەرى ولاردىڭ باسىنا قارا بۇلت ءۇيىرىلدى. 600 مىڭداي روحيندجا ميانماداعى زورلىق- زومبىلىققا شىداماي، كورشى بانگلادەشكە باس ساۋعالاپ كەتتى. ۇيىم وكىلدەرىنىڭ ايتۋىنشا، كەز كەلگەن مەملەكەت سول ەلدىڭ اۋماعىندا دۇنيەگە كەلگەن بالاعا بىردەن ازاماتتىق بەرۋى ءتيىس. سوندا عانا جەكە تۇلعانى الالاۋ توقتايدى.
كەرول باچەلور ب ۇ ۇ بوسقىندار ءىسى جونىندەگى اگەنتتىگىنىڭ وكىلى:
- ەگەر ازاماتتىعىڭىزدى راستايتىن قۇجات بولماسا، الەمدە ەشكىم ەمەسسىز. قۇقىعىڭىز قورعالمايدى، ءتيىستى جاردەم بەرىلمەيدى. ماسەلەن، ءبىلىم الىپ، جۇمىسقا ورنالاسا المايسىز. بۇل - ۇلكەن ماسەلە. قۇجاتتىڭ بولماۋى ونسىزدا از حالىقتىڭ ودان سايىن قورقىنىشىن تۋعىزادى.
www.24.kz
