اسەت يسەكەشيەۆ استانانى دامىتۋدا ماڭىزى زور ەكونوميكانىڭ 10 باسىم باعىتىن ايقىندادى

استانا. قازاقپارات - استانا اكىمى اسەت يسەكەشيەۆتىڭ ايتۋىنشا، بۇل ىستە الەمدىك تاجىربيە زەرتتەلىپ، مەگاپوليستەردىڭ ەكونوميكالىق قۇرىلىمى ساراپتالعان ، دەپ حابارلايدى ەلوردا ينفو.

«قازىرگى ارتىقشىلىقتارىمىزدى ەسكەرە وتىرىپ ءبىز تۇراقتى ەكونوميكالىق ورلەۋگە نەگىز بولاتىن 10 باسىم باعىتتى انىقتاپ وتىرمىز. ونىڭ 5-ەۋى ساۋدا- ساتتىققا قاتىستى: تۋريزم، زاماناۋي ءوندىرىس، قارجى ورتالىعى، مەملەكەتتىك سەكتور، حالىقارالىق ۇيىمدار جانە ترانسۇلتتىق كومپانيالار ىسىندەگى قىزمەت كورسەتۋ. سونىمەن قاتار، قولداۋ كورسەتۋ كوزدەلگەن 5 سالا بار: ءبىلىم، دەنساۋلىق ساقتاۋ، ساۋدا جانە لوگيستيكا، مادەنيەت پەن سپورت، كرەاتيۆتى سەكتور»، - دەدى ءا. يسەكەشيەۆ.

اكىمشىلىكتە ءار سەكتور بويىنشا سالاارالىق دامۋ ستراتەگياسى ازىرلەنىپ جاتىر. ماسەلەن، تۋريزم سالاسى بويىنشا 3 نەگىزگى باعىت ناقتىلاندى - ىسكەرلىك جانە وقيعاعا بايلانىستى تۋريزم، دەمالىس ايماعى جانە مەديتسينالىق تۋريزم.

اكىمنىڭ ايتۋىنشا، ستراتەگيا قازان ايىندا «اتامەكەن» ۇلتتىق كاسىپكەرلىك پالاتاسى مەن سالاارالىق كومپانيالاردىڭ نازارىنا ۇسىنىلادى.

«وسى جۇمىس قورىتىندىسىنان كەيىن ءبىز ينۆەستيتسيا تارتۋ جانە يننوۆاتسيالاردى دامىتۋعا قاتىستى ەكى جاڭا ستراتەگيا دايىندايمىز»، - دەپ اتاپ ءوتتى قالا باسشىسى.

 10 باسىم باعىتتى ىسكە اسىرۋ جانە جالپى كاسىپكەرلىكتى دامىتۋ ءۇشىن ەلوردادا 5 جەرگىلىكتى باعدارلاما جۇزەگە اسادى.

ولار: استانا بيزنەس، Astana-ZhasStarT، Astana Service, Astana Retail, Astana Startup. تۇتاستاي العاندا جەرگىلىكتى باعدارلامالار بويىنشا قۇنى 6 ميلليارد تەڭگەلىك 116 جوبا قولداۋعا يە بولدى. ناتيجەسىندە شامامەن 1000 جاڭا جۇمىس ورنى اشىلىپ، 350 جۇمىس ورنى ساقتالىپ قالدى. ايتالىق ەكسپو قارساڭىندا قوناق ۇيلەر، اكۆاپارك، دەلفيناري سەكىلدى نىساندار مەملەكەتتىك قولداۋعا يە بولدى.