شىمكەنتتە بىردەن 10 جۇپ ۇيلەندى - فوتو

«قالىڭدىقتار شەرۋىنە» كەلگەن جاس جۇبايلاردىڭ نەكەسى قيىلىپ، ءبىر-بىرىنە ادال بولۋعا انت بەردى، دەپ حابارلايدى قازاقپارات ح ا ا ءتىلشىسى.
وتباسى اللەياسىندا جينالعان جۇپتار سالتاناتتى نەكە كۋالىكتەرىن الىپ، جۇزىكتەرىن تاقتى.
ولارعا شاھار باسشىلىعى گۇل شوقتارى مەن سىيلىقتار تابىس ەتتى. شىمكەنت قالاسى اكىمى اپپاراتىنىڭ باسشىسى راشيد ايۋپوۆ اكىمنىڭ ارنايى قۇتتىقتاۋىن جەتكىزىپ، جاس جۇبايلارعا باقىتتى عۇمىر تىلەدى.
بۇل كۇنى نەكەسىن قيعانداردىڭ ءبىرى نۇرسۇلتان مەن گۇلبانۋ ماحابباتتارىنىڭ وسىدان ءۇش جىل بۇرىن باستالعانىن ايتادى.
كوللەدجدە وقىپ جۇرگەن جاس جىگىت قىزىلوردالىق بويجەتكەندى ءبىر كورگەننەن ۇناتىپ قالىپتى.
تانىستىقتىڭ سوڭى سەزىمگە ۇلاسىپ، وتباسىن قۇردى. ال ولاردىڭ نەكەسىن زاڭداستىرۋ ءدال قالا كۇنىنە ءدوپ تۇسكەن.
وسىلايشا ەل الدىندا جاس جۇبايلار زاڭدى قۇجاتقا قول قويدى. جاس كەلىن نەكە قيۋ راسىمىنە قازاقى كيىنىپ، اق ورامالىن تاعىپ كەلىپتى.
ايتا كەتەيىك، وڭتۇستىك شاھاردا زاڭدى تۇردە وتباسىن قۇرعاندار سانى كۇن ساناپ ارتىپ كەلەدى. بيىلعى جىلدىڭ وزىندە 4356 ادام ءتۇتىنىن تۇتەتىپ، جانۇيالى بولعان.
اۆتور: اينۇر اقبايەۆا