مەملەكەتتىك حاتشى الماتىلىق 10 جاسار بالادان ۇلگى الۋعا شاقىردى

استانا. قازاقپارات - ەلىمىزدىڭ مەملەكەت حاتشىسى گۇلشارا ءابدىحالىقوۆا قازاقستاندىقتاردى رۋحتى، ءبىلىمدى، وركەنيەتتى ادامدار دەپ اتادى.

بۇل تۋرالى قازاقپارات حابارلايدى.

«مەملەكەت باسشىسى ايتقانداي پاتريوتتىق سەزىم ءوز وتانىنا، قالاسىنا، اۋلاسىنا دەگەن ماحابباتىنان باستالادى. ءبىزدىڭ ەلىمىزدە رۋحتى، دەنى ساۋ، ءبىلىمدى، وركەنيەتتى قوعام قالىپتاسىپ، پرەزيدەنتىمىزدىڭ باستاماسىنا لايىقتى ءۇن قاتىپ كەلەدى. مىسالى، جاقىندا داۆيد بالتابايەۆ ەسىمدى ون جاسار بالا اۋلاسىنداعى قوقىستى تازالادى. داۆيدتىڭ ارەكەتى - كوپتەگەن ادامدار ءۇشىن ساباق، ۇلگى.بەلگىلى ديپلومات، قوعام قايراتكەرى، قازاقستاننىڭ العاشقى سىرتقى ىستەر ءمينيسترى تولەۋتاي سۇلەيمەنوۆ ءوز قالاسى اياگوزگە سپورت قالاشىعىن سالىپ بەردى. س ق و- داعى يليچەۆكا اۋىلىندا كاسىپكەر سايران جاقىپوۆ زاماناۋ مەدورتالىق تۇرعىزدى»، - دەدى ول اقتوبەدەگى «تۋعان جەر» فورۋمىندا سويلەگەن سوزىندە.

ونىڭ سوزىنشە اقتوبەلىكتەر دە ءوز ولكەسىنە كومەكتەسۋ تۇرعىسىنان الدىڭعى قاتاردا. ول «جۇبانوۆتار اۋلەتى» ونەر ورتالىعىنىڭ، حوككەي- جاتتىعۋ ءمودۋلىنىڭ، وبلىستىق تاريحي- ولكەتانۋ مۋزەيىنىڭ قۇرىلىسىنا قارجى بولگەندەرگە دە العىس ايتتى.

«اركىم قايىرىمدى ءىستى ءارتۇرلى باعىتتا ىستەيدى، ءبىراق سونىڭ ءبارى وتانعا دەگەن ماحابباتتى ارتتىرادى»، - دەدى مەملەكەتتىك حاتشى.

ەسكە سالساق، بۇگىن گۇلشارا ءابدىحالىقوۆا اقتوبە وبلىسىندا باستالعان رەسپۋبليكالىق «تۋعان جەر» فورۋمىن اشتى.

وسىعان دەيىن كورشى اۋلاداعى قوقىستاردى جيناۋعا بەلسەنە كىرىسكەن بالا تۋرالى جازىلعان ەدى.