قازاقستان اكروباتتارى 10- ازيا چەمپيوناتىندا توپ جاردى

«№9 -وليمپيادالىق رەزەرۆتەگى مامانداندىرىلعان بالالار- جاسوسپىرىمدەر مەكتەبىندە» سپورتتىق اكروباتيكادان X ازيا چەمپيوناتى اياقتالدى.
بىرىنشىلىك ءۇش جاس ساناتىندا وتكىزىلدى: ۇلكەندەر، 11-16 جاس ارالىعىنداعى جەتكىنشەكتەر جانە 12-18 جاس ارالىعىنداعىلار. بايراقتى باسەكەدە قازاقستان، وزبەكستان، تاجىكستان، قىتاي، ءۇندىستان، يران، سولتۇستىك كورەيا جانە گونكونگ ەلدەرىنەن كەلگەن 144 سپورتشى ءۇش كۇن بويى كۇش سىناستى.
سارى قۇرلىق باسەكەسى قازاقستاندا وسىمەن بەسىنشى رەت وتكىزىلدى. ازيا بىرىنىشىلىگى قازاقستاندا اكروباتيكانى دامىتۋ ماقساتىندا ۇيىمداستىرىلدى.
جارىس قورىتىندىسى بويىنشا جالپىكوماندالىق ەسەپ بويىنشاقازاقستان قۇراماسى ءبىرىنشى ورىنعا جايعاسا، وزبەكستان سپورتشىلارى ەكىنشى ورىندى يەلەندى. ال ۇزدىك ۇشتىكتى قىتاي كومانداسى تۇيىندەدى.
- بارلىعى جوعارعى دەڭگەيدە ءوتتى. ءبىزدىڭ كوماندا وسىنداي بايراقتى باسەكەدە العا وزىپ، جەڭىسكە جەتكەنىنە اسا قۋانىشتىمىن. ءبىز كوماندالىق جارىستاردان ءۇش كۋبوكتى يەلەندىك. ايتۋلى دودانىڭ مەدال مەن ديپلومدارىنىڭ باسىم بولىگى ءبىزدىڭ كوماندا قورجىنىندا. ارينە، ءبىز ءۇشىن بۇل ناعىز جەتىستىك، قۋانىشىمىزدى سوزبەن جەتكىزۋ مۇمكىن ەمەس، وسىنداي ناتيجە كورسەتكەن ەلىمىزدىڭ سپورتشىلارىن ماقتان تۇتامىن، - دەدى قازاقستان قۇراماسىنىڭ سپورتشىسى دياس بالتىبايەۆ.
چەمپيونات جەڭىمپازدارى مەن جۇلدەگەرلەرى ديپلوم، مەدال، جانە كۋبوكتارمەن ماراپاتتالدى.
جارىس دەنەشىنىقتىرۋ جانە سپورت كوميتەتى، قازاقستاننىڭ مادەنيەت جانە سپورت مينيسترلىگى، الماتى قالاسى اكىمدىگى، «قازاقستاننىڭ گيمناستيكا فەدەراتسياسى» جانە «الماتى قالاسى گيمناستيكا فەدەراتسيسى» قاۋىمداستىقتارىنىڭ قولداۋىمەن وتكىزىلدى.