كوكشەتاۋدا 10 مىڭنان استام بالا مەملەكەتتىك تىلدە ءبىلىم الادى
قالالىق ءبىلىم ءبولىمىنىڭ دەرەگى بويىنشا، قازىرگى تاڭدا شاھاردا بارلىعى 26 مەكتەپ بار. قالا مەكتەپتەرىندە بارلىعى 22325 وقۋشى وقيدى. ولاردىڭ 10502- ءسى مەملەكەتتىك تىلدە ءبىلىم الادى. وتكەن وقۋ جىلدارىمەن سالىستىرعاندا «التىن بەلگى» يەگەرلەرىنىڭ سانى ءۇش ەسەگە ارتقان. 11 - سىنىپتى ءتامامداعان 838 تۇلەكتىڭ 739-ى جوعارى وقۋ ورنىنا تۇسسە، ولاردىڭ 374- ى ءبىلىم گرانتتارىن جەڭىپ الدى. ال، 99 بالا ورتا كاسىپتىك كوللەدجدەردە وقيتىن بولادى. 2016-2017 وقۋ جىلىندا كوكشەتاۋ قالاسىنداعى گۋمانيتارلىق- تەحنيكالىق ليتسەيىندە 5- سىنىپ مەملەكەتتىك تىلدە وقىتىلاتىن بولادى. جالپى، جىل ساناپ قازاقشا وقيمىن دەگەن بالالار سانى ارتىپ كەلەدى. ولاردىڭ اراسىندا وزگە ۇلت وكىلدەرى بار. سونىمەن قاتار، جاڭارتىلعان ءبىلىم مازمۇنىنا وراي، 361 مۇعالىم قايتا دايارلاۋدان ءوتىپ، بىلىكتىلىكتەرىن ارتتىرعان.
اۆتور: اسلان وسپانوۆ