بالۋان شولاقتىڭ ءرولىن سومداۋ ءۇشىن ەركەبۇلان دايىروۆ 10 ك گ سالماق قوستى

الماتى. قازاقپارات - شاكەن ايمانوۆ اتىنداعى قازاقفيلم كينوستۋدياسى اتى اڭىزعا اينالعان بالۋان شولاق تۋرالى فيلم ءتۇسىرىپ جاتىر. ءتۇسىرىلىم جۇمىستارى قازىر رايىمبەك اۋدانى كەگەن اۋىلىندا ءوتىپ جاتىر، دەپ حابارلايدى قازاقپارات ءتىلشىسى.

 بالۋان شولاق ەسىمى ەڭ العاش رەت  قىزىلجار جارمەڭكەسىندە تانىلعان. ءدال وسى ءساتتى سۋرەتتەۋ ءۇشىن قازىر اۋىلدا تاريحي دەكوراتسيا جاسالىپ جاتىر. رەجيسسەر نۇرگەلدى سادىعۇلوۆ وسىنداي دەكوراتسيادا فيلمنىڭ نەگىزگى ساحناسىنىڭ تۇسىرىلىمدەرىن جۇرگىزۋدە.

 «ەگەر ول تەك بالۋان بولسا، وندا مەن سپورتقا نەگىزدەلگەن ەكشن فيلم جاسايتىن ەدىم. ول تەك حالىق كومپوزيتورى بولعانىندا، وندا شىعارماشىلىقتىڭ ادامى تۋرالى ليريكالىق فيلم تۇسىرەر ەدىم. الايدا بالۋان شولاق «سەگىز قىرلى، ءبىر سىرلى» تۇلعا، بويىنا ءتۇرلى ونەر دارىعان ادام بولعاندىقتان، فيلمدە ونىڭ وبرازىن كورسەتۋ قيىنعا سوعارى انىق. دەسە دە وسى فيلمدى كورەرمەن الدىنا ۇسىنۋ ءۇشىن بارىمىزدى سالىپ جاتىرمىز» - دەدى فيلمنىڭ رەجيسسەرى نۇرگەلدى سادىعۇلوۆ.

فيلمنىڭ قويۋشى- سۋرەتشىسى ەرجان سۇلەيمەنوۆتىڭ ايتۋىنشا، دەكوراتسيا ەكى ايدىڭ ىشىندە تۇرعىزىلعان. سۋرەتشىلەر جارمەڭكەنى ارحيۆ ماتەريالدارى مەن سۋرەتتەر نەگىزىندە جاساپ شىققان. باستى كەيىپكەرلەر - بالۋان شولاق، عاليا، بالقاديشا جانە تاتيانانىڭ كيىمدەرى كوستيۋم جونىندەگى سۋرەتشى مەرۋەرت تورىبايەۆانىڭ ەسكيزدەرى بويىنشا تىگىلگەن. رەكۆيزيتورلار توبى كينودا قولدانىلاتىن ءاربىر زاتتى تىڭعىلىقتى تاڭداي بىلگەن. رەجيسسەر فيلمنىڭ باس كەيىپكەرى - بالۋان شولاقتىڭ رولىنە اكتەردى كوپ ىزدەگەن. كاستينگكە كاسىبي اكتەرلەرمەن قاتار سپورتشىلار دا قاتىسقان. ولاردىڭ بىرەۋلەرىنىڭ بەت- الپەتى، دەنە ءبىتىمى سايكەس كەلمەسە، ەندىگى بىرەۋلەرىنىڭ اڭىز ادامنىڭ وبرازىنا كىرۋدە شەبەرلىكتەرى جەتىسپەي جاتتى. كوپ سىناقتاردان سوڭ بالۋان شولاقتىڭ رولىنە اكتەر ەركەبۇلان دايىروۆ بەكىتىلگەن. بالۋاننىڭ وبرازىنا سايكەس كەلۋى ءۇشىن اكتەر كۇرەستەن ءدارىس الىپ، ون كيلوگرامم سالماق قوسقان.

«وسى رولگە مەنى تاڭداعانى ءۇشىن رەجيسسەرگە العىسىم شەكسىز. ۇلتىمىزدىڭ ماقتانىشىنا اينالعان بالۋان شولاقتاي تۇلعانىڭ وبرازىن جاساۋ - اركىمگە بۇيىرا بەرمەيتىن باق. بۇل ءرول فيزيكالىق جانە پسيحولوگيالىق تۇرعىدان قيىنعا سوعاتىنىن جاسىرمايمىن. الايدا، وبرازدى الىپ شىعام دەپ سەنەم. دەسە دە، مەن ءۇشىن ەڭ قيىنى - ماحاببات ساحنالارى. ويتكەنى ونداي ساحنالاردى جاساۋدان ۇيالام» - دەدى ەركەبۇلان دايىروۆ.

فيلمگە ەركەبۇلان دايىروۆپەن بىرگە ەلىمىزدىڭ تانىمال اكتەرى بولات ءابدىلمانوۆ پەن جاس اكتريسا جانەل ماقاجان تۇسەدى. ەستەرىڭىزگە سالا كەتەيىك، كينوسسەناري جازۋشى، دراماتۋرگ دۋلات يسابەكوۆتىڭ م. اۋەزوۆ اتىنداعى قازاق مەملەكەتتىك اكادەميالىق دراما تەاترىندا ساحنالانعان «جاۋجۇرەك» پەساسىنىڭ جەلىسى بويىنشا جازىلعان. كەگەندەگى تۇسىرىلىمدەردەن سوڭ، ءتۇسىرۋ توبى كوكشەتاۋ مەن پاۆلودار قالالارىنا اتتانادى.

 اۆتور: گۇلميرا عوسمانالي