ەكسپو قارساڭىندا ارناساي اۋىلىندا 10 ەكو - قوناق ءۇي اشىلماق
بۇل تۋرالى ايماق باسشىسى مالىك مىرزاليننىڭ اۋدانعا جۇمىس ساپارى بارىسىندا ايتىلدى، دەپ حابارلايدى «قازاقپارات» ح ا ا ءتىلشىسى.
ەلوردانىڭ ىرگەسىندەگى ارناساي اۋىلى وزگەلەردەن ەرەكشە. بۇگىنگى تاڭدا شاعىن ەلدى مەكەن جاسىل تەحنولوگيالاردىڭ الاڭىنا اينالعان. اۋىلدا «ەكسپو-2017» كورمەسى قارساڭىندا ءبىرقاتار جوبالار جۇزەگە اسىرىلۋدا. وعان اۋىلداعى قاراپايىم تۇرعىندار دا اسقان قىزىعۋشىلىق تانىتىپ، ءوز ۇلەستەرىن قوسۋدا. اتاپ ايتقاندا، تابيعات قورعاۋشى، قۋات ساقتاۋشى، سۋ ۇنەمدەۋشى، ءونىمدى ارتتىرۋشى جانە باسقا دا جاقسى قاسيەتتەرى بار «جاسىل» تەحنولوگيالار جاپپاي ەندىرىلگەن بۇل اۋىل «ەكسپو-2017» جاھاندىق كورمەسىندە وتاندىق برەند رەتىندە شەتەلدىك قوناقتاردىڭ نازارىنا ۇسىنىلاتىن بولادى.
اۋدانعا جۇمىس ساپارى بارىسىندا وسى اۋىلدا بولعان ايماق باسشىسى قولعا الىنعان جوبالارمەن تانىسىپ، «ەكسپو-2017» كەزىندە وسىندا ايالدايتىن شەتەلدىك تۋريستەردى قارسى الۋ دايىندىعىنا نازار اۋداردى. جاسىل تەحنولوگيالار ورتالىعىنىڭ جەتەكشىسى تاتيانا نەمتساننىڭ ايتۋىنشا، بۇگىندە 168 اۋلادا تامشىلاتىپ سۋارۋ جۇيەسىن كادەگە جاراتۋدا.
ەنگىزىلىپ وتىرعان تەحنولوگيالاردىڭ تيىمدىلىگى اۋەلى جان-جاقتى سىنالادى. «2015-جىلى اشىلعان «ارناساي» جاسىل تەحنولوگيالار ورتالىعىندا العاشقى كەزدە 400 شارشى مەترلىك ورگانيكالىق باۋ-باقشادا بارلىعى 7 جاسىل تەحنولوگيا قولدانىلدى. بۇگىندە ونىڭ سانى 35 كە جەتىپ وتىر»، - دەدى تاتيانا نەمتسان.
«ەكسپو-2017» باستالاتىن ساتتە يننوۆاتسيالىق اۋىلدا استانا تۇرعىندارى مەن قوناقتارى ءۇشىن 10 ەكو-قوناق ءۇي اشۋ جوسپارلانعان. ارناسايداعى تاعى ءبىر جارقىن جوبا جاستاردىڭ «جاسىل» لاگەرى بولىپ تابىلادى. «جاسىل ەكونوميكانى قولداۋ مەن G- Global-دى دامىتۋ كواليتسياسى» ز ت ب باسقارماسى وكىلدەرىنىڭ ايتۋىنشا، اتالمىش لاگەردى اعىمداعى جىلدىڭ 6- ماۋسىمىندا اشۋ جوسپارلانعان.
وبلىس اكىمى مالىك مىرزالين ارناسايداعى جاسىل تەحنولوگيالىق ءادىستى قولدانۋدىڭ تيىمدىلىگىن ايتا كەلە، جازعى لاگەردىڭ بالالار ءۇشىن قاۋىپسىز ءارى سانيتارلىق تازالىعى جاعىنا العاندا تالاپقا ساي بولۋى قاجەتتىگىن اتاپ ءوتتى.