يسپانيالىق وقۋشى اتاسى جيناعان 10 مىڭ ەۋرونى سىنىپتاستارىنا تاراتىپ بەردى

استانا. قازاقپارات - يسپانيانىڭ بارسەلونا پروۆينتسياسىنىڭ كالدەس-مونبۋي قالاسىندا تۇراتىن 10 جاسار بالا اتاسىنىڭ 100 ەۋرولىق بانكنوتتارمەن جيناپ جۇرگەن ءبىر بۋما قارجىسىن تاۋىپ العان.

ول قارجىنى مەكتەپكە الىپ بارىپ، 10 مىڭ ەۋرودان سىنىپتاستارىنا تاراتىپ بەرگەن، دەپ جازادى newsru.com. بۇل تۋرالى ۇستازداردىڭ ءبىرىنىڭ بالالاردىڭ وتە ءىرى كولەمدەگى اقشا ۇستاپ جۇرگەنىن كورگەن سوڭ بەلگىلى بولعان.

ادەتتە مۇنشاما كولەمدەگى ءىرى اقشانى مەكتەپ وقۋشىلارى ۇستاپ جۇرمەيتىن، دەپ جازادى The Local.

وقيعا Escola Montbui باستاۋىش مەكتەبىندە بولدى. بولعان جاعداي تۋرالى WhatsApp جەلىسىندەگى اتا- انالار توبىنا حابارلانعان، سونداي-اق Onda Cero راديوستانساسى ارقىلى دا جاريالانعان. مەكتەپ وقۋشىلارىنا اقشانى قايتارۋ جونىندە ۇسىنىس جاسالدى.

«بۇگىن تاڭەرتەڭ 5- سىنىپ وقۋشىسى ۇيىنەن الىپ كەلگەن 100 ەۋرولىق بانكنوتتاردى بالالارعا تاراتىپ بەردى. ەگەر سىزدەردىڭ بالالارىڭىزدىڭ قولىنا وسى قارجىنىڭ قانداي دا ءبىر بولىگى تيگەن بولسا، مىندەتتى تۇردە مەكتەپكە حابارلاسىپ، قاجەتتى سومانى يەسىنە قايتارۋلارىڭىزدى سۇرايمىز. جالپى بارلىعى 10 مىڭنان استام ەۋرونى قايتارۋ كەرەك. ءبىز سىزدەر جاعدايدى ءتۇسىنىپ، قولداۋ كورسەتەدى دەگەن سەنىمدەمىز»، - دەلىنگەن حابارلامادا.

كاتالونيالىق El Punt Avui باسىلىمى ماسەلەنىڭ پوليتسيانىڭ ارالاسۋىنسىز شەشىلگەندىگىن جازادى. سەبەبى اقشا يەلەرى پوليتسياعا شاعىم تۇسىرمەگەن. Europa Press-تەگى دەرەككوزدەر ماسەلە شەشىمىن تاۋىپ، اقشا يەسىنە قايتارىلعاندىعىن جازادى. باسىلىم مالىمەتتەرىنشە، وقۋشىنىڭ اتاسى اقشانى ونىڭ اپاسىنا قاجەتتى مەديتسينالىق قۇرىلعى الىپ بەرۋ ءۇشىن جيناپ جۇرگەن.