ۋنيۆەرسيادا كەزىندەگى 10 ايتۋلى وقيعا - فوتو

الماتى. قازاقپارات - الماتىدا وتكەن ۋنيۆەرسيادانىڭ ەستە قالارلىق وقيعالارى «قازاقپارات» تىلشىلەرىنىڭ باقىلاۋىندا بولدى. سونىڭ ءبىرقاتارىن وقىرمان نازارىنا ۇسىنامىز.

1. ۋنيۆەرسيادانىڭ اشىلۋى.

28- بۇكىلالەمدىك قىسقى ۋنيۆەرسيادانىڭ اشىلۋىنا قازاقستان پرەزيدەنتى نۇرسۇلتان نازاربايەۆ قاتىستى. سالتاناتتى شارا قازاقستاندىق كورەرمەن عانا ەمەس، شەتەلدىك قوناقتاردىڭ دا نازارىنا شىقتى. اشىلۋىندا كورسەتىلگەن قويىلىمدار مەن سالت- ءداستۇرىمىزدىڭ كەڭىنەن تانىستىرىلۋى ەرەكشە وقيعا رەتىندە ەستە قالارى ءسوزسىز.

قازىرگى ۋاقىتتا تانىمال بولا باستاعان قازاقستاندىق ءانشى ديماش قۇدايبەرگەننىڭ ساحناعا شىعۋى ونەر سۇيەر قاۋىمدى ىنتىقتىرا ءتۇستى. قىتاي، رەسەي، ا ق ش، قازاقستان سپورتشىلارىنىڭ كوپتىگى دە ۋنيۆەرسيادانىڭ كورىگىن قىزدىرا ءتۇستى. جالپى، ۋنيۆەرسيادادا 12 سپورت تۇرىنەن 85 مەدال توپتاماسى ويناتىلدى. ق ر مادەنيەت جانە سپورت ءمينيسترى ارىستانبەك مۇحامەدي ۇلى قازاقستان قۇراماسىنىڭ مەدال سانى بويىنشا ەكىنشى ورىنعا كوتەرىلگەنىن ماقتانىشپەن اتاپ ايتتى.

بۇعان دەيىن قازاقستان قۇراماسىن ويىندار قورىتىندىسى بويىنشا ەشقاشان ەكىنشى ورىننان كورىنبەگەنىن ايتا كەتەيىك. ولاي بولسا، ەلىمىزدە وتكەن ستۋدەنتتەر سايىسى قازاقستاننىڭ ابىرويىن تاعى دا ۇستەم ەتتى. قازىرگى ۋاقىتتا قازاقستان سپورتشىلارىنىڭ قورجىنىندا 11 التىن، 8 كۇمىس، 17 قولا - بارلىعى 36 مەدال بار.

2. ۋنيۆەرسياداداعى العاشقى التىن.

قازاقستان قۇراماسىنا ءبىرىنشى التىندى جارىستىڭ ءۇشىنشى كۇنى، 31 -قاڭتاردا بياتلونشى الينا رايكوۆا الىپ بەردى. سپورتشى ەڭ باستى ماقساتى - ءوزىن جەڭۋ بولعانىن جانە سول ماقساتىنا جەتكەنىن ايتىپ، ۇلگى كورسەتتى.

3. سايىس رەكوردشىلارى!

ءبىزدىڭ قۇراما ساپىنداعى موگۋلشى يۋليا گالىشەۆا مەن دميتري رەيحەرد الماتىداعى ۋنيۆەرسيادادا ەكى دۇركىن التىن مەدال يەگەرى اتاندى. سونىمەن قاتار، بياتلونشى گالينا ۆيشنيەۆسكايا دا ەكى التىندى جەڭىپ الدى. ناگرادالار سانى بويىنشا شاڭعىشى قىزىمىز اننا شەۆچەنكو كوش باستاپ تۇر، ول التىن، كۇمىس، قولادان - جالپى سانى 5 مەدال جەڭىپ الىپ، مەرەيى ارتتى.

4. دەنيس تەننىڭ التىنى.

قازاقستان قۇراماسى ءۇشىن دەنيس تەن عانا التىن سالعان جوق، جەڭىمپاز بولعان بارلىق سپورتشى دا قۇرمەتكە لايىق. ءبىراق، مانەرلەپ سىرعاناۋ سايىسىنا بيلەتتەر قىمبات بولسا دا، الدىن الا ساتىلىپ كەتكەنىنەن- اق جانكۇيەرلەردىڭ بۇل سايىس ءتۇرىن بارىنشا باقىلاپ، تاعاتسىز كۇتكەنىن كورەمىز. دەمەك، قازاقستان نامىسىن قورعاعان دەنيس تەننىڭ ونەرىن وتانداستارىمىز اسىعا كۇتتى. دەنيس تە كوپتىڭ كوڭىلىنەن شىعىپ، ءۇمىتتى اقتادى.

5. ماحاببات.



ۋنيۆەرسيادا - جاستار سايىسى. جاستار - ءومىردىڭ كوكتەمى. ۋنيۆەرسيادا بارىسىندا «الاتاۋ» شاڭعى- بياتلون كەشەنى قىزمەتكەرى مەن «الماتى ارەنا» قىزمەتكەرى مانەرلەپ سىرعاناۋ سايىسىندا سۇيىكتىلەرىنە ءسوز سالىپ، جۇرەك قالاۋى بار ەكەنىن بارشا جۇرتتىڭ الدىندا ءبىلدىردى. بۇل دا ۋنيۆەرسيادانىڭ جوسپاردان تىس جارقىن ساتتەرى بولىپ قالدى.

6. الىپساتارلار مەن جالعان بيلەتتەر.

سايىسقا بارۋعا اسىققاندار سانى ۋنيۆەرسيادا جاقىنداعان سايىن كوبەيدى. ءبىراق، جانكۇيەرلەردىڭ دەنى قالاعان سايىستارىنا بارا المادى. انىقتاي كەلگەندە، ولارعا جاساندى بيلەت جاساۋشىلار مەن الىپساتارلار كىنالى بولىپ شىقتى. قۇقىق قورعاۋ ورگانى قىزمەتكەرلەرى ۋنيۆەرسيادانىڭ جابىلۋىنا ارنالىپ جاسالعان جالعان بيلەتتەردى دە تاپتى. وسىلايشا، كوپ جارىس تۇرىنە بيلەت تابىلماي، حالىق ابىگەرگە ءتۇستى. بۇل قىسىلتاياڭ شاقتا حالىقارالىق ستۋدەنتتەر سايىسىنىڭ فەدەراتسياسى جول تاپتى. ولار زالدان شەتەلدەن كەلەتىن ف ي س ۋ- دىڭ مارتەبەلى مەيماندارىنا بولىنگەن ورىنداردى جانكۇيەرلەرگە بەردى. بۇدان بولەك، «TicketDay» جۇيەسى بويىنشا ورىنى كورسەتىلمەگەن قوسىمشا بيلەتتەر دە ساتىلىپ، بوس قالعان ورىندارعا كىرگىزىلدى.

7. ۋنيۆەرسيادا كەزىندەگى قالانىڭ بەزەندىرىلۋى.

ارينە، ەرەكشە ەستە قالاتىن وقيعا بۇل الماتىنىڭ اجارلانا ءتۇسۋى. الماتى حالىقارالىق ستۋدەنتتەر سايىسى باستالماي- اق ساندەلدى. اسىرەسە، جاڭادان سالىنعان عيماراتتار قالاعا كورىك بەردى. ۋنيۆەرسيادا كەزىندە قالانىڭ قاردان جەدەل تازارتىلىپ وتىرعانىن دا ايتا كەتۋ كەرەك. كىرلەگەن قارلاردىڭ ۇستىنە تازا قار شاشىپ جۇرگەن كوممۋنالدىق قىزمەت جۇمىسشىلارىنىڭ ارەكەتى الەۋمەتتىك جەلىدە كۇلكىگە دە قالىپ جاتتى.

8. جاڭا عيماراتتاردىڭ سالىنۋى.

ۋنيۆەرسيادا ءۇشىن «الماتى ارەنا»، «حالىق ارەنا» سىندى مۇز ايدىنى بار ءىرى سپورت كەشەندەرى سالىنىپ، «مەدەۋ»، بالۋان شولاق اتىنداعى سپورت سارايى، «شىمبۇلاق، «سۇڭقار» سىندى سپورت عيماراتتارى قايتا جوندەۋدەن وتكىزىلدى.

9. ۋنيۆەرسيادا مۇراسى.

ۋنيۆەرسيادا ارقاسىندا الماتىنىڭ الاتاۋ اۋدانى دامىدى. بۇل اۋداندا «الماتى ارەنا»، «اتلەتتەر قالاشىعى» سىندى ەڭ ماڭىزدى نىساندار بوي كوتەردى. ۋنيۆەرسيادا اياقتالعاننان كەيىن، اتلەتتەر قالاشىعى 1 مىڭ 748 وتباسىنىڭ جاڭا قونىس تويىنا سەبەپشى بولادى. وندا ەمحانا، سۋپەرماركەت، بانك بولىمشەسى، پوليتسيا بەكەتى، پوشتا سىندى حالىققا قىزمەت كورسەتىلەتىن ورىندار بار. بۇل الماتىدا ءۇي كەزەگىندە تۇرعانداردىڭ سانىن 10 پايىزعا قىسقارتپاق.

10. جابىلۋ سالتاناتتى شاراسى.

الماتىدا 28- بۇكىلالەمدىك قىسقى ۋنيۆەرسيادانىڭ جابىلۋى ءوتتى. وعان 57 ەلدەن 2000 مىڭعا جۋىق سپورتشى قاتىستى. جابىلۋ سالتاناتى 80 ەلدە ترانسلياتسيالانىپ، 1 ميللياردتان استام كورەرمەن تاماشالادى. سالتاناتتى شاراعا ق ر ۇكىمەت باسشىسى باقىتجان ساعىنتايەۆ، حالىقارالىق ستۋدەنتتەر سپورتى فەدەراتسياسىنىڭ پرەزيدەنتى ولەگ ماتىسين، الماتى اكىمى باۋىرجان بايبەك جانە كەلەسى ۋنيۆەرسيادا ويىندارىن وتكىزەتىن رەسەيدىڭ كراسنودار ولكەسىنىڭ باسشىلىعى قاتىستى. وسىنداي جارقىن ساتتەرىمەن 28- بۇكىلالەمدىك قىسقى ۋنيۆەرسيادا حالىق ەسىندە قالماق.

فوتو: almaty2017.com

اۆتور: الماس مۇقاش ۇلى