19:05, 16 - قاڭتار 2017 | GMT +5
قازاقستان - رەسەي شەكاراسىندا «كوكا-كولا» دەپ 10 توننا سىرا وتكىزبەككە ارەكەتتەنگەن
استانا. قازاقپارات - قازاقستان - رەسەي مەملەكەتتىك شەكاراسىنداعى «جاڭاجول» باقىلاۋ- وتكىزۋ بەكەتىنىڭ (س ق و) شەكارا ناريادى ەلىمىزدەن رەسەي فەدەراتسياسىنا قاراي ساپار شەگىپ بارا جاتقان «ۆولۆو» جۇك كولىگىن توقتاتۋعا ءماجبۇر بولدى، دەپ حابارلايدى ق ر ۇ ق ك ش ق باسپا ءسوز قىزمەتى.

جۇرگىزۋشى كورسەتكەن جولقاعاز بويىنشا جۇك كولىگىنە «Coco Cola» سۋسىندارى تيەلگەن ەكەن. ءبىراق، شەكاراشىلار تەكسەرۋ بارىسىندا جۇك كولىگىنىڭ قورابىنان سۋسىندار ەمەس، كەرىسىنشە سالماعى 10 توننا بولاتىن «Kozel» سىراسىن انىقتادى. ءسويتىپ، 47 جاستاعى قازاقستاندىق ازاماتتىڭ شەكاراشىلاردى الداماق بولعان قۋلىعى ىسكە اسپاي قالدى.
اتالعان ىسكە قاتىستى ماتەريالدار س ق و ىشكى ىستەر دەپارتامەنتىنە بەرىلدى.