وتار پوليگونىنداعى جارىلىس كەزىندە انگولادان كەلگەن 10 اسكەري جاپا شەكتى
حالىقارالىق اسكەري ويىندارعا دايىندىق بويىنشا جاتتىعۋ جۇمىستارى كەزىندە انگولا كومانداسىندا 120 م م مينومەت جارىلدى، دەپ حابارلادى قورعانىس مينيسترلىگىنىڭ باسپا ءسوز قىزمەتى.
ناتيجەسىندە 1 اسكەري قىزمەتكەر اۋىر حالدە جاتىر، بىرنەشە جاۋىنگەر جەڭىل جاراقاتتار العان. جارالانعاندار وتار اسكەري بازاسىنداعى جەكە مەديتسينالىق جاساققا جەتكىزىلدى. الدىن الا تەرگەۋ بويىنشا، انگولا كومانداسى 2 ب11 مينومەتىن اتۋ كەزىندە قاۋىپسىزدىك ەرەجەسىن بۇزعان جانە كەلىسىمسىز وكوپتان شىعىپ، اتۋ پوزيتسيالارىن وزگەرتىپ، ورەسكەل قاتەلىك جىبەرگەن. ودان بولەك، قاتارىنان ەكى رەت وقتاۋ دا سناريادتىڭ جارىلۋ سەبەبى بولۋى مۇمكىن.
ق ر قورعانىس ءمينيسترى يمانعالي تاسماعامبەتوۆتىڭ بۇيرىعىمەن، قورعانىس ءمينيسترىنىڭ ورىنباسارى، گەنەرال-لەيتەنانت وقاس ساپاروۆ جەتەكشىلىك ەتەتىن كوميسسيا قۇرىلدى. ولار بولعان جايدى انىقتاپ، كوميسسيالىق تەكسەرۋ جۇرگىزۋ ءۇشىن وقيعا ورنىنا ۇشىپ كەتتى.
ايتا وتەيىك، بۇدان بۇرىن «ارتيللەريالىق وق اتۋ شەبەرلەرى» بايقاۋىنىڭ جەتەكشىسى، باس تورەشىسى گەنەرال-مايور لۇت الشەكەنوۆ 13 ەلدەن كەلگەن كومانداعا قاۋىپسىزدىك تەحنيكاسىنىڭ ەرەجەلەرىن تۇسىندىرگەن بولاتىن. اتالعان راسىمنەن كەيىن عانا كوماندا قاتىسۋشىلارى جاتتىعۋعا كىرىسۋى ءتيىس بولعان.
