قىزىلوردادا ەسىرتكى ساتقان ءۇش ايەل 10 جىلعا سوتتالدى

استانا. قازاقپارات - قىزىلوردادا گەروين ساتقان ءۇش ايەل سوتتالدى، دەپ حابارلايدى وبلىستىق قىلمىستىق ىستەر جونىندەگى مامانداندىرىلعان اۋدانارالىق سوتىنىڭ باسپا ءسوز قىزمەتىنەن.

«ەسىرتكىگە تاۋەلدى ءۇش جاس ايەل - ەسەتوۆا گۇلميرا، توقمىرزايەۆا جانار جانە ايداروۆا گۇلميرا اسا ءىرى مولشەردەگى ەسىرتكىنى وتكىزۋ ماقساتىندا زاڭسىز يەمدەنىپ، ساقتاپ، تاسىمالداپ، وتكىزىپ، اسا اۋىر ساناتتاعى قىلمىستى جاساعان.

اتاپ ايتقاندا، گ. ەسەتوۆا 2016-جىلدىڭ قاڭتار ايىندا سىبايلاسى گ. ايداروۆامەن بىرگە شىمكەنت قالاسىنا بارىپ، بۇرىن اباقتىدا بىرگە وتىرعان سىبايلاسىنان 50 گرام، ياعني اسا ءىرى مولشەردەگى «گەروين» ەسىرتكى زاتىن وتكىزۋ ماقساتىندا ساتىپ الىپ، قىزىلوردا قالاسىنا اكەلەدى. گ. ايداروۆا، ج. توقمىرزايەۆا جانە گ. ەسەتوۆا ۇشەۋى ەسىرتكىنى وتكىزۋ ماقساتىندا بولەك-بولەك فولگاعا ورامداپ (چەكتەپ)، ساتۋعا دايىنداعان. ال گەرويننىڭ ورامدالماعان ءبىر بولىگىن ۇشەۋى بىرگە سول ۇيدە وتىرىپ، ارنايى مەديتسينالىق ەرىتىندىمەن ارالاستىرىپ، تامىرلارىنا مەديتسينالىق شپريتسپەن ەگۋ ارقىلى قولدانعان.

بۇدان ءارى جاسىرىن تەرگەۋ ارەكەتتەرى جۇرگىزىلگەن. 2016-جىلى جەرگىلىكتى ۋاقىتپەن 12 ساعات 40 مينۋت شاماسىندا گ. ايداروۆا، ج. توقمىرزايەۆا جانە گ. ەسەتوۆا ۇشەۋى بىرلەسىپ، ەسەتوۆانىڭ ۇيىندە وتىرعان كەزدە ۇيگە كەلگەن ەسىرتكى ساتىپ الۋشىعا فولگاعا ورامدالعان (1 چەك)، جالپى سالماعى 0,14 گرام گەرويندى 5000 تەڭگەگە ساتقان. سوتتالۋشىلاردىڭ بارلىق ارەكەتتەرى كامەراعا تۇسىرىلگەن.

ءتىنتۋ جۇرگىزۋ بارىسىندا ج. توقمىرزايەۆانىڭ قالتاسىنان شىققان ءامياننىڭ ىشىنەن 4 بولەك فولگاعا ورالعان، جالپى سالماعى 1,42 گرام گەروين ەسىرتكى زاتى تابىلعان. ودان باسقا، ايعاق زات رەتىندە ەلەكتروندى تارازى، مەديتسينالىق شپريتستەر، فولگا قاعازدار الىنعان.

ءسويتىپ، ءۇش سوتتالۋشى ايەل، ادامدار توبىنىڭ الدىن الا ءسوز بايلاسۋىمەن، اسا ءىرى مولشەردەگى ەسىرتكىنى وتكىزۋ ماقساتىندا زاڭسىز يەمدەنىپ، ساقتاپ، تاسىمالداپ، وتكىزگەن، ياعني ق ر ق ك- ءنىڭ 297-بابى 3-بولىگىنىڭ 1,3-تارماقتارىندا كورسەتىلگەن اسا اۋىر قىلمىستى جاساعان.

ءۇش ايەلدىڭ ەكەۋى بۇرىن ەسىرتكى زاتتاردى وتكىزگەن ءۇشىن سوتتى بولعان، ۇشەۋى دە ەسىرتكىگە تاۋەلدى.

قىزىلوردا وبلىسىنىڭ قىلمىستىق ىستەر جونىندەگى مامانداندىرىلعان اۋدانارالىق سوتىنىڭ ۇكىمىمەن سوتتالۋشىلار ەسەتوۆا گۇلميرا، توقمىرزايەۆا جانار، ايداروۆا گۇلميرا ق ر ق ك- ءنىڭ 297-بابى 3-بولىگىنىڭ 1,3-تارماقتارىمەن كىنالى دەپ تانىلىپ، مۇلكىلەرى تاركىلەنىپ، ءارقايسىسى 10 جىلدان باس بوستاندىعىنان ايىرىلدى، جازالارىن جالپى رەجيمدەگى تۇزەۋ كولونيادا وتەۋ بەلگىلەندى.

ودان باسقا ولارعا جازا وتەۋ ورىندارىندا ناشاقورلىقتان ەرىكسىز ەمدەۋ تاعايىندالدى.