پوليسيا قىزمەتكەرى ايان عاليەۆ ۇلىنىڭ ومىرگە كەلۋىن 10 جىل كۇتكەن - ب. بايبەك
سول جيىندا سويلەگەن سوزىندە قالا باسشىسى باۋىرجان بايبەك مارقۇمداردىڭ وتباسىنا كوڭىل ايتا وتىرىپ، ولاردىڭ كورسەتكەن ەرلىكتەرىنە ايرىقشا توقتالدى.
«اياۋلى باۋىرىمىز ايان ەربولعان ۇلى عاليەۆ ءوز قىزمەتى مەملەكەتتىك ورگاندى كۇزەتۋ ەكەندىگىنە قاراماستان، سىرتقا باتىل ۇمتىلىپ، قىلمىسكەردى توقتاتۋعا ارەكەت ەتتى. ءوز ءومىرىن قيا وتىرىپ، اتىس ۇستىندە ونى جاراقاتتادى. ىشكى ىستەر ورگاندارىندا 20 جىلدىق تاجىريبەسى بار ول، جۇمىسقا تۇرعانىنا ءبىر جىل عانا بولعان ارىپتەسىنە: «ورتالىققا حابارلا»، - دەپ، تاپسىرما بەرىپ، نەگىزگى سوققىنى وزىنە الدى. وسىلايشا، اعالىقتىڭ، ۇلكەندىكتىڭ جارقىن ۇلگىسىن كورسەتتى. جەدەل ءارى كاسىبي ءىس-ارەكەت ەتىپ، مەملەكەتتىك كىرىستەر دەپاراتامەنتىنىڭ قىزمەتكەرلەرى مەن باسقا دا ازاماتتاردىڭ ءومىرىن ساقتاپ قالدى. 25 مينۋتقا سوزىلعان زۇلماتتى توقتاتىپ، نۇكتەسىن قويدى»، - دەدى ب. بايبەك.
سونىمەن قاتار، قالا باسشىسى كەشە ايان عاليەۆتىڭ ۇيىنە بارعانىن جەتكىزدى.
«كەشە مەن ايان باۋىرىمىزدىڭ ۇيىنە بارىپ، ونىڭ وتباسىنىڭ قاراپايىم تىنىس- تىرشىلىگىن، وسىنداي ەر ازاماتتى تاربيەلەپ وسىرگەن اناسىن، قايعىدان قابىرعاسى قايىسقان جۇبايىن، اعايىن- جاقىندارىن كوردىم. بۇگىن ولار ءبىزدىڭ ارامىزدا وتىر. جاستايىنان سپورتقا اۋەس بولىپ، ءوزىنىڭ ادىلدىگىمەن ەرەكشەلەنگەن باۋىرىمىز، تۋىستارىنىڭ ايتۋىنشا، قاشاندا جاماندىققا قانى قاس، ۇلتىن سۇيەتىن، ونىڭ تىلىمەن ءدىلىن ەرەكشە قۇرمەتتەيتىن جان بولعان. ونىڭ ارتىندا 10 جاسار قىزى مەن 7 ايلىق ۇلى قالدى. ول جۇبايى ەكەۋى ۇلدارىنىڭ ومىرگە كەلۋىن 10 جىل كۇتىپتى. جاڭا تۋعان ۇلىن قاتتى جاقسى كورگەن. «مەنىڭ ۇلىم باتىر بولادى» دەپ، ونىڭ بولاشاعىنا كۇپ ءۇمىت كۇتكەن. ءبىز مارقۇمنىڭ كورمەگەن قىزىعىن، بالا- شاعاسىنا بۇيىرتسىن دەي وتىرا، وسىنداي باتىر ۇلدى ومىرگە اكەلىپ، تاربيەلەگەن اناسىنا مىڭدا- ءبىر تاعزىم ەتەمىز»، - دەدى ب. بايبەك.
سونىمەن قاتار، ول قانقۇيلى سودىردىڭ قولىنان قازا تاپقان وتستاۆكاداعى پوليتسيا پودپولكوۆنيگى قۇقىق قورعاۋ ورگاندارىنىڭ ارداگەرى نۇريمانوۆ عاني ايتباي ۇلىنىڭ دا ەرلىك ارەكەتىنە توقتالدى.
«اعامىز ءوزىنىڭ قارۋسىزدىعىنا قاراماستان، قىلمىسكەردى توقتاتپاققا ۇمتىلعان. قارۋ اسىنعاندى اقىلعا شاقىرماق بولدى. بۇل، ءبىر جاعىنان عازيز جان ءۇشىن قوعامدىق قاۋىپسىزدىكتى ساقتاۋدىڭ ومىرلىك ۇستانىم ەكەنىن كورسەتسە، ەكىنشى جاعىنان كوزسىز باتىرلىق پەن اعالىق اڭعالدىقتىڭ، ادام بالاسىنا دەگەن شەكسىز سەنىمى قاشاندا قاتار جۇرەتىندىگىن اڭعارتسا كەرەك. قاشاندا ءوزىنىڭ قاراپايىمدىلىعىمەن، اعالىق مەيىرباندىعىمەن ەرەكشەلەنگەن مارقۇم، 25 جىل قىزمەت اتقارعان سوڭ، وتكەن جىلدىڭ سوڭىندا عانا وتستاۆكاعا شىققان ەدى. امال نەشىك!؟ تاربيەلەپ وسىرگەن ەكى ۇلىنىڭ قىزىعىن كورۋدى تاعدىر بۇيىرتپادى»، - دەدى ب. بايبەك.
ايتا كەتەلىك، ەكى پوليتسيا قىزمەتكەرى دە «قازاقستان پوليتسياسىنا 20 جىل» مەدالدارىمەن ماراپاتتالعان ەكەن.
اۆتور: ايبوتا جاپپاربەرگەن
