ازيا چەمپيوناتىندا قازاقستاننىڭ 10 بوكسشىسى جارتىلاي فينالعا شىقتى
4-5- مامىر كۇندەرى شيرەك فينالدىق كەزدەسۋلەر ءوتتى. قازاقستاننىڭ بىلعارى قولعاپ شەبەرلەرى قارسىلاستارىنان ايقىن باسىمدىق تانىتتى. ءبىرقاتار كەزدەسۋلەردە ءبىزدىڭ جاس بوكسشىلارىمىزدىڭ اۋىر سوققىلارى قارسىلاستارىن نوكداۋنعا جىبەرگەنىنە دە كۋا بولدىق.
ەرتەڭ، جۇما كۇنى، جارىس كۇندەلىگىنە سايكەس دەمالىس جاريالانىپ وتىر. ال 7- مامىر، سەنبى كۇنى جاستار اراسىنداعى بوكستان ازيا چەمپيوناتىنىڭ جارتىلاي فينالدىق كەزدەسۋلەرى وتەدى. ال 8- مامىر، جەكسەنبى كۇنى سارى قۇرلىق باسەكەسىنىڭ جەڭىمپازدارى مەن كۇمىس جۇلدەگەرلەرى انىقتالادى.
«قازسپورت» تەلەارناسى وسى جارىستى العاشقى كۇننەن باستاپ تىكەلەي ەفيردە كورسەتىپ كەلەدى. سەنبى، جەكسەنبى كۇندەرى دە سپورت جانكۇيەرلەرى تىكەلەي ەفيردە كورۋ مۇمكىندىگىنە يە بولماق. جارىستىڭ تولىق كورسەتىلۋى وسكەلەڭ ۇرپاقتىڭ دەنى ساۋ بولىپ وسۋىنە، سپورتپەن شۇعىلدانۋدىڭ پايدالى ەكەندىگىن ۇعىنا تۇسۋىنە ىقپال ەتەتىنى ءسوزسىز.
اۆتور: ايدىن بايمەن
