ريوداعى پاراليمپيادا ويىندارىنا قازاقستان سپورتشىلارى كەم دەگەندە 10 جولدامانى جەڭىپ الماق

استانا. قازاقپارات - مادەنيەت جانە سپورت مينيسترلىگى سپورت جانە دەنە شىنىقتىرۋ ىستەرى كوميتەتىنىڭ ءتوراعاسى ەلسيار قاناعاتوۆ لوندونداعى ويىندارعا قاراعاندا، ريو-دە-جانەيرودا وتەتىن 15- پاراليمپيادالىق ويىندارعا باراتىن سپورتشىلار كوبىرەك بولاتىنىن ءمالىم ەتتى.

وسى ورايدا 2012-جىلى لوندوندا وتكەن پاراليمپيادالىق ويىندارعا جەتى قازاقستاندىق سپورتشى قاتىسىپ، ونىڭ ۇشەۋى العاشقى وندىققا ەنگەنىن ەسكە سالىپ ءوتتى.

«پاراليمپيادالىق ويىنداردىڭ وندىعىنا ەنۋ جامان كورسەتكىش ەمەس. دەگەنمەن دە ءبىزدىڭ ۇلتتىق قۇرامانىڭ الدىندا قازىرگى كەزدە ەلەۋلى ماقساتتار تۇر. بۇگىندە سپورتتىڭ ءۇش ءتۇرى بويىنشا التى سپورتشى جولدامالاردى جەڭىپ الدى. سونىمەن قاتار جەڭىل اتلەتيكا، وق اتۋدان جانە ساداقپەن اتۋدان جولدامالاردى يەلەنۋ جوسپارلانىپ وتىر. جاڭادان ەنگىزىلگەن پاراكانوە تۋرالى ايتاتىن بولساق، جالعاس تايكەنوۆ بۇل باعىتتا جولدامانى جەڭىپ الۋعا تىرىسۋدا. ول كانوە بويىنشا الەم چەمپيوناتىنا قاتىسادى. بۇل رەتتە جولدامالار العاشقى ءتورت ورىنعا بەرىلەدى. جالپى، ءبىز پاراليمپيادالىق ويىندارعا 10 سپورتشىنىڭ قاتىسۋى ماقساتىن الدىمىزعا قويىپ وتىرمىز»، - دەدى ە. قاناعاتوۆ بۇگىن اتالعان ويىندارعا ەلىمىزدىڭ سپورتشىلارىن دايارلاۋ جونىندەگى شتابتىڭ وتىرىسىندا.

ايتا كەتەيىك، 15- پاراليمپيادالىق ويىنداردىڭ باستالۋىنا 161 كۇن قالدى. بۇل دودا بيىلعى 7-18 قىركۇيەكتە 23 سپورت تۇرىنەن ريو-دە-جانەيرودا وتەدى. 528 مەدال جيىنتىعى ساراپقا سالىنادى.

اۆتور: رۋسلان عابباسوۆ