شىمكەنتتە 10 مىڭعا جۋىق ادام ناۋرىز مەيرامىن جاڭا الاڭدا تويلادى - فوتو
شىمكەنت قالاسىنىڭ اكىمشىلىك ورتالىعىنىڭ الاڭىندا مەرەكەگە دايىندىق تاڭەرتەڭنەن باستالدى: مىنبەرلەر ورناتىلىپ، كيىز ۇيلەر تىگىلىپ، داستارحان جايىلدى. مۇندا مەيرامدى تويلاۋعا مىڭداعان ادام كەلدى.
مەرەكە ايماق باسشىسىنىڭ قۇتتىقتاۋ سوزىمەن باستالدى. بەيبىت اتامقۇلوۆ جۇرتتى تابيعاتتىڭ جاڭارۋ مەرەكەسىمەن قۇتتىقتاپ، ناۋرىز - ءدىني ەمەس، حالىق مەيرامى ەكەنىن، سوندىقتان ءتۇرلى ۇلت وكىلدەرىنىڭ مىڭداعان ادامىن جيناعانىن اتاپ ءوتتى.
«ناۋرىز - ۇيلەسىمدىلىك سيمۆولى. ونىڭ قازاقستاندا تويلانۋى بەرىك يدەيالىق نەگىزگە يە، سەبەبى قازاقستاننىڭ بارلىق حالىقتارى ۇيلەسىم مەن دوستىقتا تۇرىپ جاتىر. مەرەكەنى بيىلعى جىلى تويلاۋدىڭ ءمانى ەرەكشە، سەبەبى ءبىز تاۋەلسىزدىگىمىزدىڭ 25 جىلدىعىن اتاپ وتەتىن بولامىز»، - دەدى وبلىس اكىمى.
اكىمنىڭ ءسوز سويلەۋىنەن كەيىن الاڭدا «ناۋرىزناما» تەاترلاندىرىلعان باعدارلاماسى باستالدى. ساحنادا ايماقتىڭ شىعارماشىلىق ۇجىمدارى، ءداستۇرلى وبلىستىق ءان بايقاۋىنىڭ قاتىسۋشىلارى، بي توپتارى ونەر كورسەتتى.
مەرەكە قوناقتارى تەك كونسەرتتىك باعدارلامانى تاماشالاپ قانا قويماي، كەز كەلگەن كيىز ءۇيدىڭ قۇرمەتتى قوناعى بولا الدى. ولاردى وبلىس اۋداندارى مەن ايماقتاعى ءبىلىم مەكەمەلەرى دايىنداعان. الاڭدا بارلىعى 36 كيىز ءۇي تىگىلگەن، ءارقايسىسىنىڭ داستارحانى مول جايىلدى.
