شىعىس قازاقستاندا ءاز-ناۋرىز 10 كۇن تويلانادى
ناۋرىزدىڭ 13 ى كۇنى «ىرىس كۇنى» اتاۋىمەن باستالعان ارنايى كۇن «ءداستۇر كۇنى»، «جاڭعىرۋ كۇنى»، «كوكتەم شۋاعى»، «قامقورلىق كۇنى»، «جاڭارۋ كۇنى»، «جاراسىم كۇنى»، «قۋانىش كۇنى»، «شاتتىق كۇنى»، «ۇلىس كۇنى» سەكىلدى مەرەكەلىك كۇندەرگە ۇلاسپاق.
«ىرىس كۇنىندە» جۇرتشىلىق اۋىل شارۋاشىلىعى جارمەڭكەلەرىن ارالاپ، قالانىڭ ءار جەرىندە ۇيىمداستىرىلعان ءتۇرلى كونتسەرتتىك باعدارلامالاردىڭ كۋاسى بولسا، «ءداستۇر كۇنى» نەگىزىنەن ۇلتتىق قولونەر بۇيىمدارىن ناسيحاتتاۋعا ارنالدى.
ال 15 -ناۋرىزدا وتەتىن «جاڭعىرۋ كۇنىندە» ايماق پەرزەنتحانالارىندا سالتاناتتى تۇردە تۋۋ تۋرالى كۋالىكتەر تابىستالاتىن بولسا، «كوكتەم شۋاعى» كۇنى جاسوسپىرىمدەردىڭ قاتىسۋىمەن ءتۇرلى فلەشموبتار مەن كونسەرتتەر وتپەك.
ال ناۋرىزدىڭ 17 سىندە وتەتىن «قامقورلىق كۇنىندە» جاستار قاۋىمى تىل، ەڭبەك جانە سوعىس ارداگەرلەرىن مەرەكەمەن قۇتتىقتاسا، «جاڭارۋ كۇنىندە» قالا تۇرعىندارى سەنبىلىككە شىعادى. سونداي- اق، «جاراسىم كۇنىندە» ءبىلىم وردالارى مەن كىتاپحانالاردا ناۋرىز مەرەكەسىنىڭ تاريحىن باياندايتىن ءتۇرلى ادەبي كەشتەر وتەتىن بولسا، «شاتتىق كۇنىندە» ءان، ءبي بايقاۋلارى ءوتىپ، ءتۇرلى شىعارماشىلىق قايراتكەرلەرىمەن كەزدەسۋلەر ۇيىمداستىرىلادى.
ال ناۋرىزعا ارنالعان نەگىزگى مەرەكەلىك شارالار «ۇلىس كۇنىنە» جوسپارلانعان. كوكپار، قىز قۋۋ، كۇرەس سىندى ۇلتتىق ويىندار دا وسى كۇنى ەدى.
«ناۋرىز مەرەكەسىنىڭ ءوتۋ بارىسى وزگە شارالارداي ەلىمىزدىڭ تاۋەلسىزدىگىنىڭ 25 جىلدىعىنا ورايلاستىرىلىپ وتىر. مەرەكەنى اتاپ وتۋدەگى باستى ماقسات - ەلدەگى بەيبىتشىلىك پەن كەلىسىمدى نىعايتىپ، ۇلتتىق قۇندىلىقتاردى دارىپتەۋ. جوسپار بويىنشا اي كولەمىندە ايماقتا داستۇرلەر مەن وتباسىلىق قۇندىلىقتاردى ساقتاۋعا جانە نىعايتۋعا ارنالعان 600 گە جۋىق شارا وتەدى»، - دەيدى وبلىس اكىمىنىڭ ورىنباسارى جاقسىلىق ومار.
