قازاقستاندا جەڭىلدەتىلگەن اۆتو نەسيەلەۋگە تاعى 10 ميلليارد تەڭگە بولىنەدى
بۇل تۋرالى بۇگىن ورتالىق كوممۋنيكاتسيالار قىزمەتىندە وتكەن باسپا ءسوز ءماسليحاتىندا قازاقستاننىڭ دامۋ بانكىنىڭ باسشىسى بولات جامىشيەۆ ءمالىم ەتتى.
ونىڭ ايتۋىنشا، جىل باسىندا بولىنگەن ءبىرىنشى ترانش اياسىنداعى 15 ميلليارد تەڭگەنىڭ 12,5 ميلليارد تەڭگەسى جۇمسالعان.
«جەڭىلدەتىلگەن اۆتونەسيەلەۋگە بولىنگەن قاراجاتتىڭ 77 پايىزى يگەرىلدى. ەڭ ۇلكەن تانىمالدىلىققا «حيۋنداي» مەن «كيا» كولىكتەرى يە بولىپ وتىر. «شكودا» ءۇشىنشى ورىندا. «ازيا اۆتو» كومپانياسىنىڭ ليميتى تولىعىمەن يگەرىلگەن، «سارىارقا اۆتو ونەركاسىپ» ناتيجەلەرى دە ناشار ەمەس، «اگروماش حولدينگ» كومپانياسىنىڭ ناتيجەلەرى ءسال ناشارلاۋ. «اگروماش حولدينگ» تۋرالى از-كەم تۇسىندىرە كەتەيىن، ولار «پەجو» كولىكتەرىن ساتىپ الۋ بويىنشا ءبىزدىڭ اكرەديتيۆىمىزدى الۋ ءۇشىن بانكتىڭ تالاپتارىن ورىنداۋى ءتيىس بولعان. ولار جاقىندا عانا وسى تالاپتاردى ورىنداپ شىقتى. ءبىز اكرەديتيۆ اشتىق جانە قازىرگى ۋاقىتتا «پەجو» كولىكتەرىنە دە جەڭىلدەتىلگەن نەسيە الۋ مۇمكىندىگى تۋدى. جىل سوڭىنا دەيىن «اگروماش حولدينگ» جوعارىدا اتالعان ەكى كومپانيانى قۋىپ جەتەدى دەپ سانايمىن»، - دەدى ب. جامىشيەۆ.
ونىڭ ايتۋىنشا، جەڭىلدەتىلگەن نەسيە باعدارلاماسىنىڭ ەكىنشى ترانشى بويىنشا بارلىعى 10 ميلليارد تەڭگە بولىنەدى.
«ۇكىمەتتىڭ قاۋلىسى ءبىر ايدىڭ كولەمىندە قابىلدانادى دەپ ۇمىتتەنەمىز. ترانش قانداي كاسىپورىنعا بولىنەتىنىن الدىن الا ايتا المايمىن. ءبىرىنشى ترانشتىڭ يگەرىلۋ ناتيجەسى قاپەرگە الىناتىنىن ايتامىز. مەنىڭشە، قاراشانىڭ ەكىنشى جارتىسىندا ەكىنشى ترانش ءبولىنىپ، وسى باعدارلامانى جالعاستىرۋ مۇمكىن بولادى دەپ ويلايمىن»، - دەدى ب. جامىشيەۆ.
«ق د ب ليزينگ» بويىنشا كولىكتەرگە 620 ميلليون تەڭگەگە 8 ليزينگتىك كەلىسىم جاسالدى. «ق د ب ليزينگ» نەگىزىنەن ارنايى اۆتوكولىكتەرگە بەرىلەدى.
اۆتور: جاسۇلان جولدىبايەۆ
