قازاقستان شاي ىشۋدەن الەمدە 10-ورىندا تۇر

قازاقتاردىڭ شايقۇمارلىعى قىتاي بيزنەسمەندەرىنىڭ قىزىعۋشىلىعىن تۋدىرىپ وتىر.

 الماتىدا قىتايدىڭ حۋبەي پروۆينتسياسىنىڭ شاي وندىرۋشىلەرى شاي كونفەرەنسياسىن وتكىزدى. جيىن بارىسىندا وتاندىق تاۋار وندىرۋشىلەر شەتەلدىك ارىپتەستەرىمەن ىنتىماقتاستىق ورناتۋ جولدارىن قاراستىردى. سونداي- اق، ساراپشىلار قازاقستان- قىتاي ساۋدا ءۇيىن سالىپ، مەيرامحانالار مەن ءدامحانالاردا شاي سەرەمونياسىن وتكىزىپ تۇرۋدى، شاي نەگىزىندە سالقىن سۋسىن ءوندىرىسى ماسەلەسىن تىلگە تيەك ەتىلدى.

 «شاي بيزنەسىنىڭ بولاشاعى وتە زور. قازاقتار شاي ىشۋدە ۋاقىت تا، ورىن دا تالعامايدى. قازاقستاننىڭ 99 پايىز حالقى كۇنىنە 4 شىنىدان ارتىق شاي ىشەدى. شاي ءىشۋ - قازاقتاردىڭ عاسىرلار بويى قالىپتاسقان ۇلتتىق ءداستۇرى. جان باسىنا شاققاندا جىلىنا 1,54 كەلى شاي ءونىمى قولدانىلادى ەكەن. سوندىقتان، قازاقستان شاي ىشۋدەن الەمدە 10-ورىندا تۇر»، - دەدى الماتى ساۋدا جانە ينۆەستيتسيالار پالاتاسىنىڭ باس ديرەكتورى مۇحتارحان بياروۆ.

مامانداردىڭ ايتۋىنشا، قازاقستاندا جىلىنا 24,5 ميلليون كەلى شاي ساتىلادى. نارىقتىڭ 50 پايىزىن ءۇندىستان ونىمدەرى قۇرايدى. قازاقستاندىق شاي ولشەۋ فابريكالارى شيكىزاتتى ءۇندىستان، كەنيا، شري- لانكا، قىتايدان تاسىمالدايدى.

كونفەرەنسيا بارىسىندا الماتىلىقتار حۋبەي پروۆينتسياسىندا وسەتىن قارا، قىزىل، كوك جانە وزگە دە شاي تۇرلەرىنىڭ ءدامىن كورىپ، دەمدەۋ تەحنيكاسىمەن تانىستى. ايتا كەتۋ كەرەك، حۋبەي پلانتاتسياسى 1000 مەتر بيىكتىكتە ورنالاسقان. مۇندا ايگىلى لۇڭ جيڭ كوك شايى مەن سارى يمپەراتورلىق شاي، پۋەر وندىرىلەدى. الەمدەگى شاي ءوندىرىسىنىڭ تاريحى دا ەجەلگى قىتايدان باستالادى.

اۆتور: گۇلميرا عوسمانالي