قازاقستاندى ارالاعان بەلگيالىق فوتوسۋرەتشى 10 مىڭ سۋرەت جاساعان - فوتو
كورمە ونىڭ قازاقستان، قىرعىزستان جانە تاجىكستانعا بارعان ساپارىنا ارنالدى. اشىلۋ سالتاناتىنا قازاقستاندىق جانە قىرعىزستاندىق ديپلوماتتار، بەلگياداعى قازاق دياسپوراسىنىڭ وكىلدەرى، سونىمەن قاتار كورمەنى ۇيىمداستىرۋشىلاردىڭ تۋىستارى مەن دوستارى قاتىستى. ە. كوللينس قازاقپارات تىلشىسىنە بەرگەن سۇحباتىندا قازاقستانعا بارعان ساپارىنان العان اسەرىمەن ءبولىستى.
- ەليزابەت، ءبىزدىڭ ەلىمىزگە بارۋىڭىزعا نە تۇرتكى بولعانىن ايتىڭىزشى؟
- جاڭالىقتار تاسپاسىنىڭ بىرىندە ورتالىق ازيادا قازاقستان دەگەن الىپ مەملەكەت بار ەكەنىن بىلگەنمىن. قازاقستاندى ارالاپ، الىپ اۋماقتا ادامدار قالاي تۇراتىنىن كورگىم كەلدى. باستاپقىدا تەك قازاقستانعا عانا بارامىن دەپ جوسپارلاعانمىن. الايدا 2 اي سىزدەردىڭ ەلىڭىزدە بولىپ، وڭ اسەر العاندىقتان، قىرعىزستان مەن تاجىكستانعا بارۋدى ۇيعاردىم.
- قازاقستاننىڭ قاي قالالارىندا بولىپ ۇلگەردىڭىز؟
- سىزدەردىڭ اسەم قالالارىڭىزدىڭ ءبىرى الماتىعا ۇشىپ كەلدىم. كەيىن پويىزبەن سۋىق ءارى وتە كورىكتى پەتروپاۆلعا باردىم. كەيىن ەلوردا استانادا بولدىم. بۇل قالا ماعان قاتتى ۇنادى. از ۋاقىتتىڭ ىشىندە تۇرعىزىلعان قالانى كورۋگە ەرەكشە قىزىقتىم.
ساياحات كەزىندە قاراعاندى، سەمەي، وسكەمەن، بالقاش، شۋ، تاراز، شىمكەنت، ارال، بايقوڭىر، ورال، اقتوبە جانە اتىراۋ قالالارىنا سوقتىم. قازاقستاندا بولعاندا 10 مىڭ سۋرەت جاساپ، فوتوالبومدار دايىندادىم.
- قازاقستاندا بولعاننان قانداي اسەر الدىڭىز؟
- ادامدار قوناقجايلى جانە جىلى شىرايلى. مەن قوناق ۇيلەردە ەمەس، كوبىنە تۇرعىنداردىڭ ۇيىندە قوناق بولدىم. ولار بەيتانىس ادامدى تەگىن تۇرعىزدى. قازاقستاندا كەز- كەلگەن ءۇيدىڭ ەسىگىن قاعىپ كومەك سۇراساڭ، ولار مىندەتتى تۇردە قول ۇشىن سوزادى. بۇعان تاڭداندىم.
شاعىن ۇيلەرگە دە كىردىم. تۇرمىسى جاقسى بولماسا دا، ءۇي يەلەرى مەنەن بارىن ايامادى. قازاقتار قامقورشىل حالىق. ەۋروپادا وكىنىشكە قاراي ءبىز ينتروۆەرتپىز، ال ءسىزدىڭ ەلىڭىزدە كوبى ەكستراۆەرتتەر. ءسىزدىڭ ەلىڭىزدە جاستار كوپ ەكەندىگىن اتاپ وتكىم كەلەدى.
- قازاقتىڭ قانداي ۇلتتىق تاعامى سىزگە ۇنادى؟
- اسقاباق قوسىلعان مانتى، سورپا مەن لاعمان ۇنادى. سونىمەن قاتار تاندىر نان كوڭىلىمە جاقتى. وتە ءدامدى نان. ادامدارمەن ارالاسىپ، ونىڭ قالاي ازىرلەنەتىنىن ءبىلىپ الدىم. ەندى ونى ۇيدە دايىنداپ، تۋىستارىما داستارقان جايۋ ويىمدا بار.
- سۇحباتىڭىزعا راحمەت.
- قازاقستان حالقىنا راحمەت! قازاقستان - ەرەكشە ەل. وندا قايتا ورالعىم كەلەدى!
الماتىدا باستالعان حالىقارالىق عىلىمي فورۋمدا جۇيكە اۋرۋلارىن ەمدەۋ تاسىلدەرى تالقىلانۋدا
الماتى. قازاقپارات - بۇگىن الماتىدا «قازاقستاندا نەۆرولوگيا بويىنشا بىلىمدەردى جاڭعىرتۋ» تاقىرىبى بويىنشا حالىقارالىق ءبىلىم بەرۋ عىلىمي فورۋمى باستالدى. وعان جاقىن جانە الىس شەت ەلدەردەن 500 گە جۋىق دەلەگات قاتىسۋدا.
«بۇگىنگى مەديسينالىق عىلىمي فورۋم مۇنداي كەڭ كولەمدە ت م د اۋماعىندا تۇڭعىش رەت ۇيىمداستىرىلىپ وتىر. وعان اكادەميالىق رەيتينگى بويىنشا الەمدەگى ەڭ ۇزدىك 200 ۋنيۆەرسيتەتتىڭ قاتارىنا كىرەتىن مەديتسينالىق جوعارى وقۋ ورىندارىنىڭ پروفەسسورلارى، سونداي- اق، ەلىمىزدىڭ وڭىرلەرى مەن الىس جانە جاقىن شەت ەلدەردەن نەۆرولوگ دارىگەرلەر، تەراپيەۆتەر، نەيروحيرۋرگتار، رەانيماتولوگتار جانە جالپى پراكتيكالىق دارىگەرلەر كەلدى. بارلىعى شامامەن 500 گە جۋىق دەلەگات قاتىسىپ وتىر. بۇگىنگى شارانىڭ باستى ماقساتى اتى ايتىپ تۇرعانداي، نيەۆرولوگيا سالاسىنداعى ءبىلىمدى جاڭعىرتۋ، ءوزارا تاجىريبە الماسۋ جانە وسى سالادا جەتكەن جەتىستىكتەرمەن جەتە تانىسىپ، وزەكتى ماسەلەلەردى جان- جاقتى تالقىلاۋ. ينسۋلت، شاشىراڭقى سكلەروز، پاركينسون دەرتى، دەمەنتسيا سەكىلدى اۋرۋلاردىڭ ۇتىمدى ەمدەۋ جولدارىن ىزدەستىرۋ»، - دەدى ءوز سوزىندە س. اسفەندياروۆ اتىنداعى قازاق ۇلتتىق مەديتسينالىق ۋنيۆەرسيتەتىنىڭ عىلىمي قىزمەتكەرى، قازاقستان نەۆرولوگتارىنىڭ «Neurosciences» ۇلتتىق قاۋىمداستىعىنىڭ دەپاراتمەنت باستىعى ايدا كوڭدىبايەۆا.
ايتا كەتەلىك، بۇگىنگى شاراعا بۇكىل الەمدىك نەۆرولوگتار فەدەراتسياسى، ازيا جانە وكەانيا قاۋىمداستىعى جانە ەۋروپا نيەۆرولوگتارى اكادەمياسى قولداۋ كورسەتىپ وتىر.
فورۋم بارىسىندا عىلىمي باياندامالار وقىلىپ، تالقىلاۋلار جۇرگىزىلەدى جانە شەبەرلىك سىنىپتارى وتكىزىلەدى.
عىلىمي فورۋم 8- قىركۇيەككە دەيىن جالعاسادى.
اۆتور: جاپپاربەرگەن ايبوتا