جاس اقىن- جازۋشىلار ءمۇشايراسىنا 10 مىڭعا جۋىق ادام قاتىستى - الماتى
«قازىرگى كەزدە اقپاراتتىق تەحنولوگيالاردىڭ دامۋىنا بايلانىستى ادامدار كىتاپتى تىم سيرەك وقيتىن بولىپ بارادى. وقىسا دا كوبىنەسە ورىس تىلىندە شەتەلدىك اۆتورلاردى وقيدى. ءبىراق، قازاقستاندا دا دارىندى اقىن- جازۋشىلار جەتەرلىك. تەك، ولاردى وقىرماندار بىلە بەرمەيدى. سوندىقتان، ءبىز جاس اقىن- جازۋشىلارىمىزدى جانە ولاردىڭ تۋىندىلارىن حالىققا تانىتۋ ءۇشىن وسى «جازۋشىلار شاتىرىن» ۇيىمداستىردىق. وعان 200 دەي جاس اقىن-جازۋشى قاتىستى. ءبىراق، بارلىعى ساحناعا شىققان جوق، تەك 20 دان استامى عانا شىعىپ، ءوزىن جانە ءوزى جازعان شىعارمالارىن كورەرمەندەرگە تانىستىردى. شىعارمالارىنان ۇزىندىلەر وقىدى. باسقوسۋعا «جازۋشىلار شاتىرىنا» كەلىپ كەتكەن ادامدار سانى 10 مىڭداي بولدى»، - دەدى ءوز سوزىندە ەۋرازيالىق فرانچايزينگ قاۋىمداستىعىنىڭ پرەزيدەنتى، جازۋشى بەكنۇر قيسىقوۆ.
ايتا كەتەلىك، شىعارماشىلىق كەشكە داستان قادىرجانوۆ، باقىتجان بۇقارباي، قانات تاسىبەكوۆ، ايان قۇدايقۇلوۆا سىندى جاس جازۋشىلار دا قاتىستى.
فەستيۆال اياسىندا «الماتى قالالىق ورتالىقتاندىرىلعان كىتاپحانا جەلىسى» مەملەكەتتىك مەكەمەسى ءبىرقاتار كىتاپ كورمەسىن ۇيىمداستىردى. ولاردىڭ ىشىندە جەڭىستىڭ 70 جىلدىعى مەن ۇلى اقىن اباي قۇنانبايەۆتىڭ 170 جىلدىعىنا ارنالعان كىتاپ كورمەلەرىن ايتۋعا بولادى.
KitapFest كىتاپ فەستيۆالى قالا كۇنىن اتاپ ءوتۋ مەرەكەلىك باعدارلاماسى اياسىنا ۇيىمداستىرىلدى.