جاز ماۋسىمى باستالعالى بەرى استانادا 10 مىڭنان استام كوشەت وتىرعىزىلدى - فوتو

استانا. قازاقپارات - ەلوردامىز جىلدان جىلعا كوركەيىپ، جاسىلدانىپ، گۇلدەر مەن اعاشتار كوپتەپ وتىرعىزىلىپ، جاسىل كومپوزيتسيالار مەن جاسىل قورشاۋلار جاسالدى.

بۇل وراسان جۇمىستاردىڭ بارلىعىن ەلوردالىق «استانا-زەلەنستروي» كوممۋنالدىق مەكەمەسى جۇزەگە اسىرادى.

كۇن سايىن ساعات تاڭعى 7 دەن كەشكى 7 گە دەيىن اتالمىش مەكەمەنىڭ 700 جۇمىسشىسى ەلوردامىزدىڭ جاسىل يميدجىن قالىپتاستىرۋ ماقساتىندا ەڭبەك ەتەدى. ماۋسىم باسىنان بەرى 10 مىڭنان استام اعاش كوشەتتەرى وتىرعىزىلىپ، 5 شاقىرىم جاسىل قورشاۋ سالىندى، 148 مىڭ شارشى مەتردەن استام گۇلكەستەلەر جاسالدى.

«استانا-زەلەنستروي» قىزمەتكەرلەرى 300 مىڭ اعاش، 13 مىڭ بۇتا، 144 مەتر جاسىل قورشاۋعا كۇتىم جاساپ، باقىلايدى.

213 ارنايى تەحنيكا كومەگىمەن جاسىلداندىرۋشىلار تەك قانا جاسىل كوشەتتەردى وتىرعىزىپ قويماي، ولارعا كۇتىم كورسەتەدى. «استانا-زەلەنستروي» باقىلاۋىندا 663 گەگتارعا سوزىلعان اشىق جاسىل شالعىن بار.

كۇن سايىن جۇزدەگەن ادام تاڭەرتەڭ ەرتە قالا كوشەلەرىنە ەرەكشە ءتۇر بەرۋ ءۇشىن شىعادى. الايدا، ساياباقتار، شاعىن باقتار جانە شالعىنداردىڭ تازالىعىن ساقتاۋ قالامىزدىڭ ءار ءبىر تۇرعىنىنىڭ مىندەتتى ەكەنىن دە ۇمىتپاۋ كەرەك.