استانادا 10-اۆتوبۋستىڭ اپاتقا ۇشىراۋى سالدارىنان جاپا شەككەن جولاۋشىلارعا وتەماقى تولەنەدى
بۇل تۋرالى بۇگىن №1 اۆتوبۋس پاركى باسشىسىنىڭ مىندەتىن اتقارۋشى ءسابيت بولاتوۆ حابارلادى.
ونىڭ سوزىنە قاراعاندا، وتەماقىنى ساقتاندىرۋ كومپانيالارى تولەيدى. «جاعدايعا بايلانىستى سوما ءار ءتۇرلى بولادى»، - دەدى س. بولاتوۆ. سونداي-اق ول جول- كولىك وقيعاسىنا بايلانىستى تەرگەۋ امالدارىن استانا قالاسىنىڭ ءى ءى د قىزمەتكەرلەرى جۇرگىزىپ جاتقانىن ايتتى.
«جۇرگىزۋشىنىڭ سوزىنە قاراعاندا، ول كولىكتى باسقارعان كەزىندە ەسىنەن تانىپ قالعان»، - دەدى س. بولاتوۆ.
ونىڭ ايتۋىنشا، جۇرگىزۋشى وتە تاجىريبەلى. ونداعان جىلدار بويى كولىك جۇرگىزىپ كەلەدى. سونىمەن قاتار، ول Iveco اۆتوبۋستارى ساتىلىپ الىنعاندا كەلىسىم بويىنشا فرانسيادا ارنايى وقۋدان وتكەن. بۇل ونىڭ ۇزدىك جۇرگىزۋشىلەردىڭ ءبىرى ەكەنىن كورسەتەدى. جۇمىسقا شىعار الدىندا جۇرگىزۋشى ءۇش كۇن - بەيسەنبى، جۇما، سەنبى كۇندەرى دەمالعان. جولعا شىعار الدىندا مەديتسينالىق تەكسەرىستەن ءوتتى. ياعني، اپاتتىڭ ورىن الۋىنا ەش نەگىز بولماعان، - دەيدى س. بولاتوۆ.
رەسمي دەرەكتەرگە سايكەس كولىك وقيعاسىنان 21 ادام جاپا شەكتى.
«بۇگىن، تاڭعى ساعات 10 -دا ولاردىڭ 16-سى اۋرۋحانادان شىعارىلعانىن، بەسەۋى اۋرۋحانادا جاتقانىن انىقتادىق»، - دەدى س. بولاتوۆ.
جاپا شەككەندەردىڭ ىشىندە 2006 -جىلى تۋعان بالا بولدى. الايدا ونىڭ ومىرىنە ەش قاۋىپ تونبەگەندىكتەن، دارىگەرلەر ۇيىنە قايتارىپ جىبەردى.
