قورعاستاعى قويمادا جارامدىلىق مەرزىمى وتكەن كونتراباندالىق تاۋارلار 10 جىلدان استام ساقتالۋدا
جالپى سوماسى 100 ميلليون تەڭگە بولاتىن بۇل تاۋارلاردىڭ جارامدىلىق مەرزىمى ءوتىپ كەتكەن. بۇل تۋرالى وبلىس پروكۋرورلارى كەزەكتى القا وتىرىسىندا مالىمدەدى.
ولاردىڭ اقپاراتىنشا، ايماقتاعى كەدەندىك بەكەتتەردىڭ بارلىعىندا - «الاتاۋ - ت س ت و»، «تالدىقورعان»، «ىلە» جانە «قورعاس» بەكەتتەرىندە وسىنداي جاعداي تۋىنداعان. ورتاشا العاندا، بۇل بەكەتتەردە جىلىنا 60 ميلليارد تەڭگەنىڭ تاۋارى كەدەندىك تازارتىلادى.
ۋاقىتشا ساقتاۋ قويمالارىنان (ۋ س ق) كەيدە بۇل تاۋارلار ۇرلانادى.
وسىلايشا، ىلە اۋداندىق سوتىنىڭ ۇكىمىمەن امانقۇلوۆ كونتراباندا ءۇشىن سوتتالدى. 7 ميلليون تەڭگەنىڭ جۇگى مەملەكەت پايداسىنا تاركىلەندى. الايدا كونتراباندالىق جۇك ءىس جۇزىندە مەملەكەتتىڭ پايداسىنا وتپەي، ۋ س ق- دان زاڭسىز شىعارىلعان. اتالعان فاكتى بويىنشا تەرگەۋ ءجۇرىپ جاتىر.
سونىمەن قاتار كونتراباندالىق ۆاليۋتانىڭ مەملەكەتتىڭ پايداسىنا وتكىزىلمەگەنى انىقتالدى. «قورعاس» بەكەتىنىڭ ساقتاۋ كامەراسىندا 11580 ا ق ش دوللارى جانە 200 قىتايلىق يۋان كولەمىندەگى اقشا تابىلدى. ءبىر جىل بۇرىن زاڭدى كۇشىنە ەنگەن سوت ۇكىمىنە سايكەس بۇل قاراجات مەملەكەت كىرىسىنە ءوتۋى ءتيىس ەدى.
وبلىس پروكۋراتۋراسى قاراجاتتى مەملەكەتكە وتكىزۋ بويىنشا ۇيعارىمى ەنگىزىلدى.
