بۇگىنگى كۇنى ايەلدەر كاسىپكەرلىگىن قولداۋعا 10 ميلليارد تەڭگەدەن استام قاراجات ءبولۋ جوسپارلانىپ وتىر - گ. ءابدىقالىقوۆا
بۇل تۋرالى بۇگىن 8- ستانا ەكونوميكالىق فورۋمى اياسىندا ءوتىپ جاتقان «نۇرلى جول - جاڭا مۇمكىندىكتەر» تاقىرىبىنداعى حالىقارالىق ىسكەر ايەلدەر فورۋمىندا ق ر مەملەكەتتىك حاتشىسى گۇلشارا ءابدىقالىقوۆا ايتتى.
«مەملەكەت باسشىسى ايەلدەر قاۋىمىنىڭ قوعام داۋىنداعى ەرەكشە ءرولىن باسا ايتا كەلىپ، «قازاقستان-2050» ستراتەگياسىندا ايەلدەر قاۋىمىن مەملەكەتتىك جانە قوعامدىق باسقارۋ جۇمىستارىنا بەلسەندى تۇردە تارتۋ كەرەكتىگىنە نازار اۋدارتادى. وسى جانە باسقا دا قولايلى جاعدايلاردىڭ ارقاسىندا ەلىمىزدە جىلدان جىلعا ءوز كاسىبىمەن اينالىساتىن ايەلدەر سانى كوبەيىپ كەلەدى»، - دەدى ول.
مەملەكەتتىك حاتشىنىڭ ايتۋىنشا، 2014 - جىلى جۇرگىزىلگەن حالىقارالىق ەسەپتەۋىندە قازاقستان ايەلدەر مەن ەرلەردىڭ اراسىنداعى باسەكەلەستىك كوەففيتسيەنتى بويىنشا الەمدە 25- ورىنعا تابان تىرەگەن. بۇل وتە جوعارى كورسەتكىش دەپ ايتۋعا بولادى.
«قازاقستاندا بۇگىنگى كۇندە ايەلدەردىڭ ەكونوميكالىق تۇرعىدا تاۋەلسىز بولۋىنا بارلىق جاعدايلار جاسالعان. سونىمەن قاتار ايەلدەردىڭ كاسىپكەرلىكپەن اينالىسۋىنا دا بارلىق العىشارتتار بار. سولاردىڭ ءبىرى مەملەكەت باسشىسىنىڭ ينفراقۇرىلىمدى دامىتۋعا ارنالعان «نۇرلى جول» مەملەكەتتىك باعدارلاماسى دەپ ايتۋعا بولادى. باعدارلاما ينۆەستيتسيالار تارتۋعا مۇمكىندىك بەرىپ، جاڭا جۇمىس ورىندارىن اشۋعا جانە جۇمىسسىزدىق دەڭگەيىن تومەندەتۋگە جول اشادى. «نۇرلى جول» باعدارلاماسى اياسىندا كاسىپكەرلىك سۋبەكتىلەرى 400 مىڭنان استام جۇمىس ورنىن اشىپ، ولاردىڭ شىعاراتىن تاۋارىنىڭ مولشەرى 150 ميلليارد تەڭگەگە ۇلعايادى»، - دەپ اتاپ ءوتتى گ. ءابدىقالىقوۆا.
ونىڭ مالىمەتىنشە، بۇگىنگى كۇنى كاسىپكەر ايەلدەردىڭ بەلسەندىلىگىنىڭ ارتقانى انىق بايقالىپ وتىر. ماسەلەن، ەلىمىزدەگى شاعىن جانە ورتا بيزنەس باسشىلارىنىڭ 40 پايىزدان استامىن ايەلدەر قاۋىمى قۇرايدى. كەيبىر وڭىرلەردە ءوز ءىسىن دوڭگەلەتىپ وتىرعانداردىڭ 48 پايىزى - ايەلدەر.
«مەملەكەتتە كاسىپكەر ايەلدەردىڭ ءىسىن قولداۋعا ارنالعان باعدارلامالار جۇمىس ىستەۋدە. بيزنەستى دامىتۋ بويىنشا قابىلداناتىن ءتۇرلى مەملەكەتتىك باعدارلامالاردا گەندەرلىك تەپە- تەڭدىك قاتاڭ تۇردە ساقتالادى. 2009-2015 - جىلدارعا ارنالعان ايەلدەر كاسىپكەرلىگىن ميكرونەسيەلەۋ باعدارلاماسى اياسىندا «دامۋ» كاسىپكەرلىكتى قولداۋ قورى» جەلىسى بويىنشا 1469 كاسىپكەر ايەلگە قولداۋ كورسەتىلىپ، ولاردىڭ ءوز ءىسىن اشۋىنا نەمەسە كاسىبىن كەڭەيتۋىنە مۇمكىندىك بەرىلدى. بۇگىنگى كۇنى ايەلدەر كاسىپكەرلىگىن قولداۋعا 10 ميلليارد تەڭگەدەن استام قاراجات ءبولۋ جوسپارلانىپ وتىر.
سوڭعى 5 جىلدا ايەلدەر ۇسىنعان 5 مىڭنان استام جوبالار قارجىلاندىرىلدى. سونىمەن قاتار، مۇمكىندىگى شەكتەۋلى ايەلدەردىڭ كاسىپكەرلىكپەن اينالىسۋىنا دا ەرەكشە نازار اۋدارىلادى. ماسەلەن، بىلتىر ولاردىڭ تاراپىنان تۇسكەن بيزنەس- جوبالارىنا 691 نەسيە ءبولىندى. سونداي- اق، مەملەكەت تاراپىنان 1324 مۇگەدەك- كاسىپكەرلەرگە قولداۋ كورسەتىلسە، ولاردىڭ 60 پايىزى ايەلدەر قاۋىمى بولعان»، - دەپ اتاپ ءوتتى گ. ءابدىقالىقوۆا.
