قازاقستان مەن قىتاي شەبەرلەرى 10 مىڭ تەكشە مەتر قاردان مۇسىندەر جاسادى - فوتو
مۇزدان جاسالعان مۇسىندەر جالپى كولەمى 5 مىڭ شارشى مەتر بولاتىن اۋماقتا ورنالاستى. قازاقستان مەن قىتاي شەبەرلەرى از عانا ۋاقىتتىڭ ىشىندە اۋا رايىنىڭ جىلىلىعى مەن قاردىڭ ازدىعىنا قاراماستان، ۇلكەن قار جانە مۇز مۇسىندەرىن جاسادى.
فەستيۆالعا قاتىسۋشىلار ءوز ويىنداعىلارىن جۇزەگە اسىرۋى ءۇشىن «قورعاس» ورتالىعىنا 10 مىڭ تەكشە مەترگە جۋىق جاساندى قار جەتكىزىلدى.
«مەن بولاشاقتا ءبىزدىڭ فەستيۆالىمىز الەمدەگى وسىعان ۇقساس شارالاردىڭ اراسىندا لايىقتى ورىنعا يە بولادى دەپ سەنەمىن، سەبەبى ونىڭ ەرەكشەلىگى - ول ءبىر ۋاقىتتا ءبىر تەرريتوريادا، ءبىراق ەكى ءتۇرلى مەملەكەتتە ءوتىپ جاتىر»، - دەپ اتاپ ءوتتى فەستيۆالدىڭ اشىلۋ سالتاناتىندا «قورعاس» شى ح و» اق پرەزيدەنتى اسحات حاميتوۆ.
فەستيۆال اياسىندا «دۋنفان» حالىقارالىق كورمە ورتالىعىندا قازاقستان مەن قىتايدان 19 جاس جۇبايلاردىڭ سالتاناتتى نەكە قيۋ ءراسىمى ءوتتى. سونداي-اق كەشكى مەرەكەنىڭ قوناقتارىنا ارنالىپ كونسەرت قويىلدى. وعان قازاقستان مەن قىتاي ارتىستەرى قاتىستى. قار مەن مۇزدىڭ قورعاس فەستيۆالىن جىل سايىن وتكىزۋ جوسپارلانىپ وتىر.
