ەڭ جويقىن تابيعي اپاتقا 10 جىل

استانا. قازاقپارات - اپات ايتىپ كەلمەيدى. دۇنيەجۇزىندە ويران سالعان تابيعاتتىڭ شالكەز مىنەزىنەن تونگەن قاۋىپ كۇشەيىپ بارادى.

الايدا، وسىدان تۋرا 10 جىل بۇرىن بولعان جويقىن جەر سىلكىنىسى مەن دۇلەي داۋىل وڭتۇستىك-شىعىس ازيا مەن افريكا ەلدەرىنىڭ ءالى ەسىندە.

اپات ءۇندى مۇحيتىنان باستالىپ، قارا قۇرلىققا دەيىن جەتكەن بولاتىن. 2004 - جىلدىڭ 26 - جەلتوقسانىندا 9 بالدىق كۇشتى ءزىلزالا بولىپ، ارتى جولىنداعىسىن جايپاعان سۋناميگە ۇلاسقان. شري-لانكا، ءۇندىستان، يندونەزيا، تايلاند سياقتى ەلدەردى تىپ-تيپىل ەتكەن تابيعي اپات افريكا حالىقتارىن دا ەسەڭگىرەتىپ تاستادى.

7 مىڭ شاقىرىم جەرگە دەيىن بارعان دۇلەي داۋىل 300 مىڭ ادامنىڭ ءومىرىن قيعان. اپاتتان كەيىن 10 مىڭداعانى ءىزىم-قايىم جوعالىپ، ميلليونداعان تۇرعىن ءومىرىن جاڭادان باستاۋعا ءماجبۇر بولدى.

سانگحاۆي، اپاتتان امان قالعان تۇرعىن:

- سۋناميدىڭ كەسىرىنەن اتا-انام قايتىس بولدى. مەن سياقتى مىڭداعان بالا جاقىندارىنان ايىرىلدى. مەنىڭ قۇربى-قۇرداستارىمنىڭ موينىنا اۋىر جۇك ءتۇستى. وقۋ وقىپ، ءبىلىم الۋمەن قوسا، وزىنەن كەيىن باۋىرلارىنا قولعابىس بولۋعا تۋرا كەلدى. ايتىپ كەلمەيتىن اپاتتان، اسىرەسە بالالار وراسان زارداپ شەكتى.

سابيلەر قىرشىن كەتتى. ەسى كىرىپ ۇلگەرمەگەن بۇلدىرشىندەر ءتىپتى ءتۇر-الپەتىن بىلمەستەن باۋىرلارىنان ايىرىلدى. سەبەبى، اپات سالدارىنان ولاردىڭ سۋرەتى دە قالماعان. شىعىن جاعىنان العاندا بۇل الەم تاريحىنداعى ەڭ جويقىن 10 تابيعي اپاتتىڭ ءبىرى بولدى.

ال ءزىلزالادان كەيىنگى سۋناميگە كەلەر بولساق، بۇرىن سوڭدى ودان كۇشتى داۋىل بولماعان. وعان دەيىن 1703- جىلى كوتەرىلگەن سۋنامي جاپونياداعى 100 مىڭ تۇرعىننىڭ ءومىرىن جالماعان بولاتىن.

24.kz