قىزىلجار اۋىلىنىڭ تۇرعىندارى 10 جىل جارىقسىز وتىر

استانا. قازاقپارات -  استانا ىرگەسىندەگى  قىزىلجار اۋىلىنداعى 300 ءۇيدىڭ جارىقسىز وتىرعانىنا كوپ جىلدىڭ ءجۇزى بولدى.

تۇرعىندار اس قامداۋ ءۇشىن وت جاعىپ، ساماۋرىن قايناتىپ كۇنەلتەدى.

وقۋشىلار مەكتەپتەگى شاڭ باسقان كومپيۋتەرلەردىڭ قىزىعىن كورەتىندەرىنە سەنبەيدى. استانادان 20 شاقىرىم قاشىقتىقتا ورنالاسقان  قىزىلجار اۋىلىنىڭ تۇرعىندارى 10 جىل جارىقسىز وتىر. ولار كورشىلەرىنەن جالىنىپ ەلەكتر ەنەرگياسىن سۇراۋعا ءماجبۇر.

بيىل دا ەلدى مەكەنگە جارىق كەلمەيتىنى بەلگىلى. سوندىقتان تۇرعىنداردىڭ مايشام ۇستاپ وتىرۋدان باسقا امالى جوق. تۇرعىندار جارىقتىڭ جوقتىعىنان بالالاردىڭ مۇمكىندىگى شەكتەلىپ جاتقانىن ايتادى. مۇنداعى جەتكىنشەكتەر ءۇي تاپسىرماسىن ورىنداۋدى كەشكە قالدىرماۋعا تىرىسادى.

ال ۇلكەندەردىڭ بار تاپقانى -  اكىمدىكتىڭ تابالدىرىعىن توزدىرۋ. الايدا بىتكەن ءىس كورىنبەيدى. جارىقتىڭ جوقتىعى بىلاي تۇرسىن، تۇتاس اۋىل سۋعا دا ءزارۋ. سالىنعان سۋ مۇناراسى قىستىڭ سۋىعىنا شىداماي ءبىر جىلدان كەيىن ىستەن شىققان.

نۇرجامال بەيسەنعالي قىزى، قىزىلجار اۋىلىنىڭ تۇرعىنى:

- وسىندا تۇرعانىمىزعا 6  جىل بولدى. استانانىڭ ءدال جيەگىندە تۇرامىز. سوندا مىناۋ نە ماسقارا؟ نەمەرەمىز، اۋرۋ كىسىمىز بار. جارىق بەرسىن. ءوزىمىزدى ءوزىمىز ەمدەيمىز. قاراڭعىدا قالاي ءدارى جاعامىز؟ جاعداي بولماعاسىن تۇرعىندار، ءتۇرلى ايلا-شارعىلارعا دا بارادى.

جەتپىسباي اباقاسوۆ، قىزىلجار اۋىلىنىڭ تۇرعىنى:

- وزگە كوشەلەردە جارىق بار. ولاردى ەسكى اۋىل دەيدى. وسىندا كەلگەننەن كەيىن 1  جىلدان سوڭ جارىق بەرەتىندىگىن ايتقان. ەندى جارىقسىز قالاي وتىرامىز؟ كوشەنىڭ ارعى بەتىندەگى 300-400 مەتر جەردەن قازىپ، وزگەلەردەن جارىق الىپ وتىرمىز. بيلىكتەن كۇدەر ۇزگەن تۇرعىندار بۇل ماسەلەنى شەشۋدىڭ جولىن وزدەرى تاپقان.

الايدا ءبارى سول ءبىر قاراجاتقا كەلىپ تىرەلەدى. ۇيلەرىندە جارىقتىڭ بولعانىن قالايتىنداردىڭ ءارقايسىسى قالتاسىنان 400 مىڭ تەڭگە بەرۋى ءتيىس. الايدا بۇل ازىرگە مۇمكىن بولماي وتىر.

تۇياق قىلىشبايەۆ،  قىزىلجار اۋىلىنىڭ تۇرعىنى:

- ءبىزدىڭ ۇيلەرىمىزدى جانىندا 600 ك ۆ ت ترانسفورماتورلىق شاعىن ستانسالار تۇر. وندا 300 ك ۆ ت ارتىق. ءۇش ءجۇز كيلوۆاتتان 66 ءۇيدى سۆەتپەن قامتاماسىز ەتۋگە بولادى. مەكتەپتىڭ جانىندا 630 كۆتبولاتىن ترانسفورماتورلىق شاعىن ستانسا سالىندى. وعان تاعى ۇيلەردى جالعاۋعا بولادى. سونىڭ ارقاسىندا ماسەلە شەشىمىن تابار ەدى. تۇرعىنداردىڭ مۇڭىن مۇڭداپ، جەرگىلىكتى اكىمگە دە باردىق. الايدا ءۇمىتىمىز اقتالعان جوق. بيىلعى جىلدى  قىزىلجارلىقتار تاعى دا جارىقسىز وتكىزەدى. ماسەلەنىڭ ءمان-جايىن تۇسىندىرگەن اكىم ەلدى مەكەندەردى ابباتتاندىرۋعا بولىنەتىن قاراجات الدەقاشان بەكىتىلىپ قويعانىن ايتادى.

شەنەۋنىكتەردىڭ سالعىرتتىعى ما الدە جايباسارلىعى ما، ايتەۋىر،  قىزىلجار ۇكىمەت بولەتىن قاراجاتتان جىلدا قۇر قالادى.

ولەگ پرۋتوۆ، قابانباي باتىر اۋىلدىق وكرۋگىنىڭ اكىمى:

- ءبىز جوبانى 2013 - جىلدىڭ ەكىنشى جارتىسىندا ازىرلەدىك. ەلدى مەكەندەردى دامىتۋ باعدارلاماسىنىڭ بيۋدجەت قاراشا ايىندا بەكىتىلەدى. ءبىز ۇلگەرمەدىك. سول سەبەپتى ول بيىل قارجىلانبايتىن بولدى. بىزگە اقشا تەك 2015 - جىلى بەرىلەدى. ەگەر دە يگەرىلمەگەن قارجى قالسا، اۋىلدى جارىقپەن قامتاماسىز ەتۋ جۇمىستارى بيىل باستالۋى مۇمكىن. ال سۋ ارناسى تۋرالى ايتاتىن بولساق، ونى سالعان كەزدە تەحنيكالىق تالاپتار ساقتالماعان. كەلەشەكتە وبلىس باسشىلىعى ونى قولعا الامىز دەدى. اكىمنىڭ سوزىنە سەنسەك،  قىزىلجارلىقتار تاعى ءبىر جىلعا شىداسا بولعانى. الايدا حالىقتىڭ شىدامى تاۋسىلعان. بار جيعان تەرگەنىنە ءۇي تۇرعىزعان بۇل ازاماتتار قونىس اۋدارۋعا ءماجبۇرمىز دەپ وتىر.

اۆتورلارى: داريعا تاشەنوۆا، جاندوس بيتاباروۆ

24.kz