ا ق ش-تا 10جىل بۇرىن جوعالعان قىز ءتىرى تابىلدى

استانا. قازاقپارات - 10 جىلدان بەرى جوعالدىعا سانالعان كاليفورنيالىق قىز امان-ساۋ كۇيىندە تابىلدى، دەپ جازادى بي-بي-سي.

ونى تۇتقىندا ۇستاپ كەلگەن قىلمىسكەردىڭ قاماۋعا الىندى.

جاپا شەگۋشى Facebook-تەن اپەكەسىن تاۋىپ الىپ، سودان سوڭ پوليتسياعا ءوزى حابار بەرگەن.

سانتا- انا قالاسىنىڭ پوليتسياسى بۇدان 10 جىل بۇرىن 15 جاسار قىزدىڭ جوعالىپ كەتكەنىن جاريالاعان بولاتىن. قازىر ونىڭ جاسى 25 تە.

ەسىمىن اتاماۋدى سۇراعان ايەل تۇتقىنداۋشىسى وعان تۇرمىسقا شىعۋعا جانە بالا تۋۋعا ماجبۇرلەگەنىن ايتادى. ونى وسى ۋاقىتقا دەيىن تۇتقىندا ۇستاپ كەلگەن 41 جاسار يسيدرو گارسياعا كوپتەگەن ايىپ تاعىلۋدا: زورلىق، زاڭسىز باس بوستاندىعىنان ايىرۋ.

ونى پوليتسيا قىزمەتكەرلەرى تۇتقىنداعاندا كورشىلەرى تاڭ-تاماشا بولىپتى. سوڭعى ساتكە دەيىن ولار وزدەرىنىڭ قاسىندا باقىتتى جۇپ ءومىر سۇرەدى دەپ ويلاپ كەلگەن.