ءبىر كۇندە 109 مىڭ قازاقستاندىق ۆاكسينا الدى
نۇر-سۇلتان. قازاقپارات - ەلىمىزدە 30-ساۋىردەگى ۆاكسيناتسيالاۋدىڭ تاۋلىكتەگى قارقىنى 109 مىڭعا دەيىن ءوستى جانە 1-ساۋىردەگى مالىمەتپەن سالىستىرعاندا 11 ەسەگە ۇلعايدى، دەپ حابارلايدى قازاقپارات دەنساۋلىق ساقتاۋ مينيسترلىگىنە سىلتەمە جاساپ.
«حالىقتى جاپپاي يممۋنداۋ ءۇشىن ەلىمىزدىڭ بارلىق ەمحانالارى مەن ءىرى ساۋدا ورتالىقتارىندا 1400 ۆاكسيناتسيا پۋنكتى اشىلدى، ونىڭ ىشىندە 300 ى كوشپەلى. 11 مىڭنان استام مەديتسينا قىزمەتكەرى ۆاكسيناتسيا ناۋقانىن وتكىزۋگە تارتىلدى. ءساۋىر ايىنىڭ سوڭىندا 2,3 ميلليون قازاقستاندىق ءۇشىن ۆاكسيناتسياعا قولجەتىمدىلىك قامتاماسىز ەتىلدى. COVID-19-عا قارسى ۆاكسينانىڭ ءبىرىنشى دوزاسىن ەرىكتى نەگىزدە 1293379 ادام جانە 266457 ادام ۆاكسينانىڭ ەكىنشى دوزاسىن الدى»، دەلىنگەن حابارلامادا.
ۆەدومستۆونىڭ مالىمەتىنشە، الەمدەگى رەيتينگىگە سايكەس قازاقستان 177 ەلدىڭ ىشىندە 30 ساۋىردەگى جاعداي بويىنشا كوروناۆيرۋس ينفەكسياعا قارسى ۆاكسيناتسيالانعانداردىڭ ءابسوليۋتتى سانى بويىنشا 51 -ورىندا تۇر.
«ۆاكسيناتسيا قارقىنى قازىر ازاماتتاردىڭ وزدەرىنىڭ سانالى كوزقاراسىنا، جاقىندارىنىڭ دەنساۋلىعى مەن جالپى يممۋنيتەتتىڭ پايداسىنا ولاردىڭ دۇرىس تاڭداۋىنا بايلانىستى ەكەنىن اتاپ وتكەن ءجون. بۇل رەتتە، ۆاكسيناتسيا ەرىكتى نەگىزدە جۇزەگە اسىرىلادى جانە ەل تۇرعىندارىنىڭ ۆاكسينانىڭ ءۇش ءتۇرىن (SputnikV، QazVac جانە HayatVax) تاڭداۋ مۇمكىندىگى بار»، دەلىنگەن حابارلامادا. مينيسترلىكتىڭ مالىمدەۋىنشە، حالىق بەلسەندىلىگىنىڭ وسى قارقىنىن ساقتاۋ اي سايىن شامامەن 2 ميلليون حالىقتى ۆاكسيناتسيالاۋمەن قامتۋدى قامتاماسىز ەتۋگە مۇمكىندىك بەرەدى.
«قازاقستاندا قولدانىلاتىن ۆاكسينالار قاۋىپسىزدىك پەن تيىمدىلىككە تەكسەرۋدەن ءوتتى، سوندىقتان ولار كوروناۆيرۋس ينفەكسياسىن جۇقتىرۋعا قارسى دالەلدەنگەن قۇرال. بۇگىنگى تاڭدا تەك ۆاكسيناتسيا ەلدەگى ەپيدەميولوگيالىق جاعدايدى تۇراقتاندىرۋعا مۇمكىندىك بەرەتىنىن ەستەن شىعارماۋ كەرەك»، دەلىنگەن حابارلامادا.
قازىرگى ۋاقىتتا بۇكىل الەمدە كورونوۆيرۋس ينفەكسيانىڭ تارالۋىنىڭ كۇرت ءوسۋى بايقالادى. دۇنيەجۇزىلىك دەنساۋلىق ساقتاۋ ۇيىمىنىڭ ستاتيستيكا دەرەكتەرىنە سايكەس 30-ساۋىردەگى جاعداي بويىنشا COVID - 19 جۇقتىرۋدىڭ 151104146 جاعدايى تىركەلدى، ونىڭ ىشىندە 128987465 ادام جازىلدى، 3178208 قايتىس بولدى، ءولىم-ءجىتىم كورسەتكىشى %2,1. ءبىر تاۋلىك ىشىندە 879586 جاعداي تىركەلگەن، كوروناۆيرۋس ينفەكسياسىمەن اۋىراتىنداردىڭ جالپى سانىنىڭ ءوسۋى - %0,6.
«قازاقستاندا سىرقاتتانۋشىلىقتىڭ ءوسۋىن تۇراقتاندىرۋ ءۇردىسى بايقالادى. سوڭعى ءۇش اپتا ىشىندە اۋرۋ ورتاشا ەسەپپەن تاۋلىگىنە 2,6 مىڭ جاعداي دەڭگەيىندە. حالىقتى جاپپاي يممۋنداۋ ارقىلى ۇجىمدىق يممۋنيتەتكە قول جەتكىزۋ - بۇل شەكتەۋ شارالارىنىڭ جالعىز بالاماسى جانە الەمدەگى پاندەميامەن كۇرەسۋدىڭ ءتيىمدى ءادىسى»، دەدى مينيسترلىكتەن.
