استانالىقتار «109» - عا كەز كەلگەن شاعىم بويىنشا حابارلاسا الادى - يسەكەشيەۆ

استانا. قازاقپارات - استانا اكىمى اسەت يسەكەشيەۆ ازاماتتاردىڭ ءوتىنىشى مەن شاعىمدارىن وڭدەۋگە قاتىستى جۇيەنىڭ جەتىلدىرىلگەنىن ءمالىم ەتتى، دەپ حابارلايدى قازاقپارات ءتىلشىسى.

  قالا اكىمىنىڭ Facebook-تەگى ءوز پاراقشاسىندا 109 قىزمەتى بازاسىندا قۇرىلعان «iKomek» قالالىق مونيتورينگ جانە جەدەل ارەكەت ەتۋ ورتالىعىن تانىستىردى. اتالعان قىزمەت بايلانىستىڭ بارلىق ءتۇرىن قامتىعان. اتاپ ايتقاندا، 109 ستاتسيونارلىق تەلەفوندارى، Facebook-تەگى توپتار مەن Telegram-داعى چات- بوتتار، سونداي- اق الەۋمەتتىك جەلىلەرگە، ەلەكتروندىق پوشتاعا، Smart Astana موبيلدىك قوسىمشاسىنا مونيتورينگ جۇرگىزۋ.

شاھار باسشىسىنىڭ ايتۋىنشا، اتالعان قىزمەتتىڭ ارقاسىندا قانداي دا ءبىر ماسەلە بويىنشا قايدا جانە قالاي شاعىمدانۋعا بولاتىنىن ءتۇسىنۋ ءۇشىن اكىمدىككە بارىپ، باسقارمالار مەن كوممۋنالدىق كاسىپورىنداردىڭ قۇرىلىمىنا ەنۋدىڭ، تەلەفون نومىرلەرىن ىزدەۋدىڭ قاجەتى بولمايدى.

«مەيلى ول شاتىردان اققان سۋ، ىستەن شىققان ليفت، تۇنگى ۋاقىتتاعى شۋ نەمەسە سۋدىڭ، جىلۋدىڭ، ەلەكترەنەرگياسىنىڭ بولماۋى، اشىق قالعان قۇدىق، تازالانباعان قار نە بولماسا قاڭعىباس جانۋارلارعا قاتىستى شاعىم بولسىن، كەز كەلگەن ءوتىنىش تىركەلەدى جانە ول جاۋاپتى باسقارماعا جىبەرىلىپ، باقىلاۋعا الىنادى. جالپى، شتاتتان تىس جاعدايلاردىڭ 164 تۇرىنە جەدەل ارەكەت ەتۋدىڭ الگوريتمى جاسالىنعان. ماسەلەلەردىڭ كەيبىرىن سول مەزەتتە نەمەسە جارتى ساعات ىشىندە شەشۋگە بولسا، اسا قيىن اپاتتاردىڭ الدىن الۋ بىرنەشە ساعاتتى قاجەت ەتۋى مۇمكىن»، - دەدى اسەت يسەكەشيەۆ.

اكىمدىكتىڭ دەرەكتەرىنە سايكەس، «iKomek» قىزمەتىنە بىلتىر تۇرعىنداردان 400 مىڭنان اسا ءوتىنىش تۇسكەن. ال اعىمداعى جىلدىڭ باسىنان بەرى ولاردىڭ سانى 200 مىڭنان اسقان. ءوز كەزەگىندە، قالالىق قىزمەت كورسەتۋ ورتالىقتارىنا كەلەتىن ازاماتتاردىڭ سانى 5 ەسەگە ازايعان. ەگەر بۇعان دەيىن كۇنىنە 5 مىڭعا جۋىق ادام كەلەتىن بولسا، قازىرگى تاڭدا ولاردىڭ سانى مىڭعا جاقىن.