الماتىلىقتار جول جيەگىندەگى تۇراققا كولىگىن قالدىرۋ ءۇشىن اقى تالاپ ەتكەندەردى 109 نومىرىنە حابارلاي الادى
بۇل تۋرالى بۇگىن الماتى قالاسى اكىمىنىڭ باسپا ءسوز قىزمەتىنەن حابارلادى.
«بۇل تۋرالى ءتيىستى شەشىم 20- قازاندا الماتى اكىمدىگىندە اۆتوتۇراقتىق ينفراقۇرىلىمدى دامىتۋ ماسەلەسى بويىنشا وتكەن جيىندا قابىلداندى»، - دەلىنگەن بۇگىنگى تاراتىلعان حابارلامادا.
الماتى قالاسىنىڭ اۆتوتۇراقتىق ينفراقۇرىلىمىن دامىتۋ بويىنشا ازىرلەنگەن كەشەندى جوسپارعا سايكەس، 1- قاراشادان باستاپ، تروتۋارلىق ۇلگىدەگى بارلىق اۆتوتۇراقتاردا جۇرگىزۋشىلەردەن تولەم الۋعا تىيىم سالىنادى.
كەلىسىمدىك مىندەتتەمەلەردى ورىنداماعاندارى جانە سالىق زاڭناماسىنىڭ تالاپتارىن تالاي رەت بۇزعاندارى ءۇشىن، وسى اۆتوتۇراقتاردى باسقاراتىن ۇيىمدارمەن جاسالعان كەلىسىم- شارتتاردىڭ كۇشى جويىلدى.
ايتا كەتكەن ءجون، بۇل تىيىم ساۋدا كەشەندەرى، ويىن-ساۋىق مەكەمەلەرى، اۋەجاي، ۆوكزال جانە جەكە مەنشىك يەلىگىندە جاتقان باسقا دا جەر تەلىمدەرىندە ورنالاسقان اۆتوتۇراقتارعا قاتىسى جوق.
بۇل تىيىم سالۋ شاراسى الماتى قالاسىنىڭ اقىلى اۆتوتۇراقتارىنىڭ ءبىرىڭعاي جۇيەسى ەنگىزىلگەنگە دەيىن، ياعني 2016 -جىلدىڭ مامىرىنا دەيىن كۇشىندە بولادى.
بۇدان بىلاي بارلىق تروتۋارلىق ۇلگىدەگى اۆتوتۇراقتاردا تولەم تالاپ ەتۋ زاڭسىز بولىپ سانالادى. اۆتوكولىك جۇرگىزۋشىلەرى وسىنداي تالاپتارعا تاپ بولعان جاعدايدا الماتى قالاسىنىڭ ءبىرىڭعاي كەزەكشىلىك- ديسپەتچەرلىك قىزمەتىنىڭ «109» نومىرىنە حابارلاسۋلارىنا بولادى.
بۇدان باسقا، جەكە قولعا اۆتوتۇراق جاساۋعا بەرىلگەن، ءبىراق جالعا الۋ مەرزىمى اياقتالعان، سونداي- اق، يگەرىلمەگەن نەمەسە ماقساتسىز پايدالانىلعان جەر تەلىمدەرى مەملەكەت مەنشىگىنە قايتا الىناتىن بولادى.
قازىرگى تاڭدا بۇل جەر تەلىمدەرىندە كوپدەڭگەيلى پاركينگتەر جاساۋ ماسەلەسى قارالىپ جاتىر.
ايتا كەتەلىك، بۇل ماسەلە العاش رەت «نۇر وتان» پارتياسىنىڭ الماتى قالالىق فيليالى جانىنداعى جەمقورلىققا قارسى ارەكەت جاساۋ بويىنشا قوعامدىق كەڭەسىنىڭ وتىرىسىندا كوتەرىلگەن بولاتىن.
اۆتور: جاپپاربەرگەن ايبوتا
