وسكەمەندە جىل سوڭىنا دەيىن 1081 پاتەردى پايدالانۋعا بەرۋ جوسپارلانۋدا
جالپى اۋماعى 85,7 مىڭ شارشى مەتر بولاتىن 1009 پاتەرلى 12 ءۇيدى 2014 - جىلدىڭ سوڭىنا دەيىن پايدالانۋعا بەرۋ كوزدەلگەن، دەپ حابارلادى دەپۋتاتتارعا قالا اكىمى تەمىربەك قاسىمجانوۆ ءماسليحات سەسسياسىندا.
قوسىمشا 60 پاتەرلىك نەسيەلىك تاعى ءبىر ءۇي مەن 1- قالالىق اۋرۋحانا ماڭىندا دارىگەرلەرگە ارنالعان 70 پاتەرلىك جالعا بەرىلەتىن جاتاقحانا سالۋ جوسپارلانعان.
سونداي-اق اكىم حابارلاعانداي، «قازاقستاندىق يپوتەكالىق كومپانيا» ا ق «سامۇرىق-قازىنا» قورىنىڭ قاتىسۋىمەن جالپى اۋماعى 40,6 مىڭ شارشى مەتردى قۇرايتىن 225 پاتەرلىك ءبىر ءۇي سالۋ جوسپارلاعان.
مەملەكەتتىك-جەكەمەنشىكتىك ارىپتەستىك اياسىندا بيىل پروكۋراتۋرا قىزمەتكەرلەرىنە ارنالعان اۋماعى 6,3 مىڭ شارشى مەتر 63 پاتەرلىك توعىز قاباتتى تۇرعىن ءۇيدى سالۋ جوسپارلانعان.
«تەمىربەتون بۇيىمدارى زاۋىتى» «راحات» تۇرعىن ءۇي كەشەنىن سالادى. 180 پاتەرلىك ءۇيدىڭ اۋماعى 45 مىڭ شارشى مەتر بولادى. 72 پاتەردى جىلدىڭ سوڭىنا دەيىن پايدالانۋعا بەرۋ جوسپارلانعان. جالپى، وسكەمەندە 2014 - جىلدىڭ سوڭىنا دەيىن 1081 پاتەر قولدانىسقا بەرىلەدى دەپ جوسپارلانعان.
الدىمەن اتا-انا قامقورىلىعىنسىز قالعان جەتىم بالالار، جاستار، مەملەكەتتىك مەكەمەلەردىڭ قىزمەتكەرلەرى باسپانامەن قامتىلادى. بۇگىنگى تاڭدا قالادا تۇراتىن ۇ و س ارداگەرلەرى مەن وعان قاتىسقانداردىڭ بارلىعى باسپانامەن قامتاماسىز ەتىلدى، دەپ اتاپ ءوتتى قالا باسشىسى.
