الماتىدا كەڭسەدەن 105 ميلليون تەڭگەسى بار سەيف ۇرلاندى

قازىرگى ۋاقىتتا كۇدىكتىلەر انىقتالىپ، قاماۋعا الىندى. «قىلمىس 31-تامىزعا قاراعان ءتۇنى بولدى. رىسقۇلوۆ داڭعىلىندا ورنالاسقان قالالىق فيرمالاردىڭ ءبىرىنىڭ كەڭسەسىنەن بىرەۋلەر 105 ميلليون تەڭگە سالىنعان سەيفتى ۇرلاپ كەتكەن. قىلمىستى اشۋ ماقساتىندا ارنايى جەدەل- تەرگەۋ توبى قۇرىلدى. كومپانيالاردىڭ بەينەباقىلاۋ كامەرالارىنداعى دەرەكتەر زەرتتەلدى. قىلمىسكەرلەر بەتتەرىن مۇقيات جاسىرعان. ءبىراق، جەدەل ءىس- شارا ناتيجەسىندە كۇدىكتىلەردىڭ ەكەۋى دە انىقتالىپ، قاماۋعا الىندى. بۇل 1992 جانە 1993 -جىلى تۋعان جەرگىلىكتى تۇرعىندار. بۇعان دەيىن ولار مۇلىكتىك قىلمىس جاساعانى ءۇشىن جاۋاپقا تارتىلعان. ايعاقتى زاتتار، سونىڭ ىشىندە ۇرلانعان اقشالار ءىس جۇرگىزۋ تارتىبىندە يەسىنە قايتارىلدى»، - دەدى الماتى قالالىق پوليتسيا دەپارتامەنتى كريمينالدىق پوليتسيا باسقارماسىنىڭ باستىعى ەركىن ىڭكاروۆ.

فيرمانىڭ باسشىسى ۆيتاليي كيم پوليتسيا قىزمەتكەرلەرىنە وسى قىلمىستىڭ جەدەل اشىلعانى ءۇشىن ريزاشىلىعىن ءبىلدىردى.

«پوليتسيا قىزمەتكەرلەرىنە وسى قىلمىستى تەز ارادا اشقانى ءۇشىن العىس ايتقىم كەلەدى. بۇل ءبىز ءۇشىن ماڭىزدى: ءبىز ءۇش اعايىندىمىز، رەسەيدەن قۇرىلىس ماتەريالدارىن جەتكىزۋ بويىنشا بىرلەسكەن كاسىپ جۇرگىزەمىز»، - دەدى ول.

اۆتور: گۇلميرا عوسمانالي