اقتوبەلىك 105 جاستاعى قاريا ەلباسىعا العىس ايتىپ، ولەڭ شۋماقتارىن جاتقا وقىدى - فوتو، كەسكىن
عاسىردان دا ۇزاق جاساعان قاريالار ەل ىشىندەگى تۇراقتىلىق پەن بەيبىت ءومىر ءۇشىن ەلباسىنا العىس ايتىپ، ولەڭ جولدارىن وقىپ بەردى، دەپ حابارلايدى قازاقپارات ءتىلشىسى.
بۇگىن اقتوبە وبلىسىنىڭ اكىمى 8 -ناۋرىز - حالىقارالىق ايەلدەر كۇنىنە وراي ۇزاق جىلدار بويى ەڭبەك ەتىپ، ەل دامۋىنا ۇلەس قوسقان، بالا تاربيەلەپ، ۇرپاق تاربيلەگەن قاريالاردى قۇتتىقتادى. 101 جاستاعى اقجارقىن تۇرعانوۆا ۇزاق جىلدار بويى اقتوبە وبلىسى، بايعانين اۋدانىندا تۇردى. كولحوزدا جۇمىس ىستەپ، اۋىل شارۋاشىلىعىن كوللەكتيۆتەندىرۋگە ۇلەس قوستى. ەكى بالا تاربيەلەگەن انا بۇگىندە 15 نەمەرە، 18 شوبەرە، ەكى شوپشەكتىڭ قىزىعىنا كەنەلىپ وتىر. 
ال 105 جاستاعى ەۆدوكيا بوندارەنكونىڭ ويى شيراق، ولەڭ شۋماقتارىن جاتقا وقيدى. وبلىس اكىمىمەن كەزدەسكەن قاريا قىس، كوكتەم مەزگىلدەرىنە ارنالعان ولەڭ شۋماقتارىن وقىپ، ەل ىشىندەگى تۇراقتىلىق پەن بەيبىت ءومىردى ساقتاپ وتىرعان ەلباسىنا العىسىن ايتتى. «مەنىڭ وتباسىم مەملەكەت باسشىسى نۇرسۇلتان نازاربايەۆقا العىس ايتادى. ەلىمىزدە تۇراقتىلىق ورناعان، ءومىرىمىز تىنىش. ادام ءۇشىن ەڭ ماڭىزدىسى بەيبىت زامان»، - دەدى ەۆدوكيا بوندارەنكو.
ول اقتوبەنىڭ مارتوك اۋدانىندا تۋىپ، وسكەن. مەكتەپتە ەدەن جۋۋشى بولىپ جۇمىس ىستەپ، كەيىن اقتوبە حروم قوسىندىلارى زاۋىتىندا ەڭبەك ەتتى. سول ءوندىرىس ورنىندا تۇراقتى جۇمىس ىستەپ، زەينەتكە شىقتى. 
«سىزدەر ادال ەڭبەك ەتىپ، اقتوبە وبلىسىنىڭ دامۋىنا ۇلەس قوسىپ، سول ارقىلى وسكەلەڭ ۇرپاقتى تاربيەلەدىڭىزدەر. ەڭبەك جولدارىڭىز بىزدەر ءۇشىن ۇلگى. ءبىزدىڭ مىندەتىمىز سىزدەرگە قۇرمەت كورسەتۋ»، - دەدى وبلىس اكىمى بەردىبەك ساپاربايەۆ كەزدەسۋ كەزىندە. ءوڭىر باسشىسى مەرەكەگە وراي قاريالارعا گۇل سىيلاپ، سىيلىق بەردى.
اۆتور: التىناي ساعىندىقوۆا
