جاپونياعا تايفۋن جاقىنداپ قالدى: 103 اۋە رەيسى توقتاتىلدى
نۇر-سۇلتان. قازاقپارات - جاپونيادا ەلدىڭ ورتالىق جانە شىعىس اۋداندارىنا اسا كۇشتى «فاكساي» داۋىلىنىڭ جاقىنداپ قالۋىنا بايلانىستى جۇزدەن استام ىشكى رەيستەر شەگەرىلىپ، پويىزداردىڭ، ونىڭ ىشىندە جۇردەك پويىزداردىڭ قوزعالىسى ازايتىلدى، دەپ حابارلايدى NHK تەلەارناسى.
ەلدىڭ باس مەتەورولوگيالىق اگەنتتىگىنىڭ دەرەكتەرىنە قاراعاندا، تاپ قازىرگى ۋاقىتتا «فاكساي» تايفۋنى حاتيدزە ارالىنىڭ باتىس جاعىندا 140 شاقىرىم جەردە. ول سولتۇستىك باتىستان ساعاتىنا 30 شاقىرىم جىلدامدىقپەن جىلجىپ كەلەدى. تەڭىزدەگى تولقىننىڭ بيىكتىگى 10 مەترگە جەتۋى مۇمكىن.
اۋا رايىنىڭ قولايسىزدىعىنا بايلانىستى توكيونىڭ حانەدا اۋەجايىن ەلدىڭ وزگە اۋداندارىمەن بايلانىستىراتىن 103 ىشكى اۋە رەيسى كەيىنگە قالدىرىلدى. سونداي-اق، كەشكى مەزگىلدە توكيو مەن وساكا قالاسى اراسىندا قاتىنايتىن 50 جۇردەك پويىز توقتاتىلدى.
