قاراعاندىدا جامباستىڭ مويىن جاعى سىنعان 101 جاستاعى قارياعا وتا جاسادى
بۇل تۋرالى وبلىستىق دەنساۋلىق ساقتاۋ باسقارماسىنىڭ باسپا ءسوز قىزمەتىنەن حابارلادى.
«4- شىلدەدە ماقاجانوۆ اتىنداعى كلينيكاعا 1915-جىلى تۋعان شاۋكەي جۇقان ۇلى ءتۇستى. ونى تەكسەرگەن ماماندار ەندوپروتەزدەۋ وتاسىن جاساۋ شەشىمىنە كەلدى»، - دەدى وبلىستىق دەنساۋلىق ساقتاۋ باسقارماسىنىڭ باسپا ءسوز حاتشىسى ايجان يسا.
دارىگەرلەردىڭ اقپاراتىنشا، وتا 35 مينۋت جاسالدى.
«ناۋقاستىڭ جاس ەرەكشەلىگىن ەسكەرە وتىرىپ ونى رەانيماتسيالىق بولىمشەگە جايعاستىردى. ەكىنشى تاۋلىكتە قاراپايىم پالاتاعا كوشىرىلدى. ءتورتىنشى كۇنى ول ءجۇرىس ارباسىمەن قوزعالا باستادى»، - دەپ اتاپ ءوتتى ا. يسا.
بۇگىن شاۋكەي جۇقان ۇلى كلينيكادا قايتا قالىپقا كەلۋ ەمدىك شارالارىن قابىلداپ جاتىر.
دارىگەرلەر جامباستىڭ مويىن جاعىنىڭ سىنۋى قارتتاردا ءجيى كەزدەسەتىنىن اتاپ ءوتتى. زاماناۋي ەمدىك شارالارى قاريانى بىرنەشە كۇندە اياعىنا تۇرعىزۋعا مۇمكىندىك بەرەدى. وتالار كەپىلدەندىرىلگەن مەديتسينالىق كومەك اياسىندا تەگىن جاسالادى.