ورالدا 101 جاستاعى مايدانگەردى ۇلتتىق ۇلان كۇنىمەن قۇتتىقتادى - فوتو
«باتىس» وڭىرلىك قولباسشىلىعىنىڭ باسپا ءسوز قىزمەتىنەن تۇسكەن مالىمەتكە قاراعاندا، پولكوۆنيك م. ساتوۆ باس قولباسشىنىڭ قۇتتىقتاۋ حاتى مەن باعالى سىيلىعىن تابىس ەتتى. مايدانگەردىڭ قىزى تاتيانا سەمەنوۆنا باس قولباسشىعا قۇتتىقتاۋى ءۇشىن شىنايى ريزاشىلىعىن ءبىلدىردى. ۇلتتىق ۇلاننىڭ قۇرىلعان كۇنىنە وراي وسىنداي قۇتتىقتاۋلار ق ر ىشكى ىستەر ورگاندارىنىڭ بارلىق ارداگەرىنە جىبەرىلگەن.
سەمەن اكيموۆيچ دانيلين 101 جاستان اسسا دا، ءالى تىڭ، جىگەرلى. وسى جاسقا جەتۋىنىڭ ءوزى جاسىنان اسكەري تارتىپكە ۇيرەنىپ، دەنساۋلىعىن شىڭداپ، كۇتكەنىنىڭ ارقاسى دەپ بىلەدى. ول اسكەري قىزمەتكەرلەرگە سىيلىقتارى ءۇشىن العىسىن ايتىپ، ءوز ءومىرى تۋرالى قىسقاشا اڭگىمەلەپ بەردى. سىرنايىن قولىنا الىپ، ءان دە سالدى.
كۋرسك وبلىسىندا 1914 -جىلى 30 -قىركۇيەكتە شارۋا وتباسىندا دۇنيەگە كەلگەن س. دانيلين اكەسىنەن ەرتە ايىرىلدى. ءوزى ءومىر ەسىگىن اشقان جىلى ءبىرىنشى دۇنيەجۇزىلىك سوعىس ءجۇرىپ جاتقان ەدى، اكەسى سودان ورالمادى. اناسى بۇل قازانى كوتەرە الماي، ومىردەن ەرتە كەتتى. اعاسى اندرەي مەن سەمەندى اتا- اجەسى تاربيەلەپ ءوسىردى. جەتىجىلدىق مەكتەپتى بىتىرگەننەن كەيىن پەدتەحنيكۋمدا ءبىلىم العان سەمەن دانيلين سوعىسقا دەيىن تاريح ءپانىنىڭ مۇعالىمى بولىپ جۇمىس جاسادى. ۇيلەنىپ، 1939 -جىلى ۇلكەن قىزى گالينا ومىرگە كەلدى. ۇلى وتان سوعىسىنا باستان-اياق دەرلىك قاتىسىپ، 1942 -جىلى بريانسك اسكەري- ساياسي ۋچيليشەسىنىڭ كۋرسانتتىعىنان 143-گۆارديالىق مينومەت پولكى باتالون كومانديرىنىڭ ساياسي ءبولىم جونىندەگى ورىنباسارلىعىنا دەيىنگى جولدان ءوتتى. « قىزىل جۇلدىز»، ەكىنشى دارەجەلى وتان سوعىسى وردەندەرى، كوپتەگەن مەدالدارمەن ماراپاتتالدى.
«ساياسي جەتەكشى رەتىندە جاۋىنگەرلەردى تالاي رەت شابۋىلعا كوتەرۋگە تۋرا كەلدى. ول ءۇشىن ءسوز تابا ءبىلۋ دە كەرەك ەدى. ستالينگراد تۇبىندەگى، سودان كەيىن كۋرسك يىنىندەگى الاپات شايقاستار ەسىمدە. ءتىپتى كۋرسك يىنىندەگى ۇرىستا وق كەۋدەمدەگى «قىزىل جۇلدىزعا» ءتيىپ، وردەن مەنى ءبىر اجالدان ساقتاپ قالدى»، دەپ ەسكە الادى مايدانگەر.
سوعىستان كەيىن سەمەن دانيلين الماتىدا، كەيىن قاراعاندىدا ىشكى اسكەرلەر پولكى كومانديرىنىڭ ساياسي ءبولىم جونىندەگى ورىنباسارى بولىپ قىزمەت ەتتى. قىزى تاتيانا ورالدا تۇرعاننان كەيىن زايىبى اننا پاۆلوۆنا (قازىر مارقۇم) ەكەۋى وسىندا كوشىپ كەلدى.
«ءبىز، ەڭ باستىسى، كوپ ۇلتتى قازاقستاندا تاتۋ- ءتاتتى ءومىر سۇرۋدەمىز. ەلىمىز قارقىندى دامىپ كەلەدى. نۇرسۇلتان نازاربايەۆتاي ەلباسىمىز باردا ءبارى دە جاقسى بولادى»، دەدى س. دانيلين.
اۆتور: ەلجان ەرالى
